De acordo co artigo 23.1º da Lei 6/1994, de 29 de decembro, de orzamentos xerais da Comunidade Autónoma de Galicia para 1995, o Consello da Xunta de Galicia, por Decreto 48/1995 do 16 de febreiro, autorizou a realización das operacións financeiras recollidas na devandita lei mediante a emisión de débeda pública ou a concertación de créditos, facultando, así mesmo, ó conselleiro de Economía e Facenda para que estableza as condicións nas ditas operacións e dicte as disposicións necesarias para tal efecto.

Por todo isto,

DISPOÑO:

Artigo 1º

Obtida a autorización, establecida no artigo 14 apartado 3º da Lei orgánica 8/1980, do 22 de setembro, de financiamento das comunidades autónomas, mediante acordo do Consello de Ministros do 7 de xullo 1995, disponse a emisión de débeda pública interior por un importe de 21.000 millóns de pesetas.

Artigo 2º

Esta emisión realízase baixo a forma de bonos da Xunta de Galicia representada mediante anotacións en conta, ó amparo do artigo 55 da Lei 24/1988, do 28 de xullo, do mercado de valores.

A emisión de débeda pública que autoriza a presente orde, distribuirase en dous tramos A e B, que terán as características que se detallan a continuación:

CONDICIÓNS COMÚNS:

-Data da emisión: 26 de xullo de 1995.

-Data de desembolso: 26 de xullo de 1995.

-Prezo da emisión: á par libre de gastos para o subscritor.

-Nominal dos bonos: 100.000 pesetas.

-Subscrición: realizarase directamente polas entidades aseguradoras, actuando no nome propio ou por conta de terceiras persoas.

-Período de subscrición: do día 17 ó 26 de xullo de 1995.

-Cupón: os cupóns anuais vencerán o 26 de xullo de cada ano. A Xunta de Galicia pagará no seu vencemento os cupóns polo seu importe líquido. Se o posuidor é un investidor non residente que non opere en España mediante establecemento permanente, pro- cederase á devolución de oficio das retencións practicadas, segundo procedemento establecido na resolución da Dirección Xeral de Política Financeira e Tesouro desta consellería, do 22-10-1993 (DOG 8-11).

-Cotizacións: solicitarase a inscrición desta débeda pública á Central de Anotacións de Débeda Pública do Banco de España na forma prevista nos artigos 55 e seguintes da Lei 24/1988, do 28 de xullo, lei de mercado de valores, e haberá que aterse ó establecido no Real decreto 505/1987, do 3 de abril e 1009/1991, do 21 de xuño, OO.MM. do 19 de maio de 1987 e 31 de decembro de 1991 e os demais preceptos legais que as desenvolven.

-Fiscalidade: de conformidade co previsto no artigo 14.5º da Lei orgánica 8/1980 do 22 de setembro de financiamento das comunidades autónomas, esta emisión goza dos mesmos beneficios e condicións cá débeda pública do Estado.

-Reserva minorista: reservarase un 10% do importe total da emisión para investimentos non superiores a 5 millóns de pesetas.

CONDICIÓNS ESPECÍFICAS:

Tramo A:

-Importe: 10.000 millóns de pesetas.

-Amortización: dunha soa vez á par, ós tres (3) anos desde a data da emisión.

-Tipo de xuro: 11,15%

Tramo B:

-Importe: 11.000 millóns de pesetas.

-Amortización: dunha soa vez, á par, ós catro (4) anos desde a data da emisión.

-Tipo de xuro: 11,30%

Disposición derradeira

Esta orde entrará en vigor o mesmo día da súa publicación no Diario Oficial de Galicia.

Santiago de Compostela, 17 de xullo de 1995

José Antonio Orza Fernández

Conselleiro de Economía e Facenda

95-4760