Conforme ós fins atribuídos a este centro nos artigos 3.1º g) da Lei 10/1989, do 10 de xullo, 2.1º h) do Decreto 306/1990, do 24 de maio, e 5 do Decreto 336/1990, do 8 de xuño, faise pública a convocatoria, de dúas bolsas de colaboración en tarefas de estudio sobre a linguaxe administrativa galega, que se rexerá polas seguintes bases:

Primeira.-Obxecto.

O obxecto desta convocatoria é a adxudicación de dúas bolsas de colaboración en tarefas de estudio sobre a linguaxe administrativa galega.

Segunda.-Dotación.

A dotación de cada bolsa consistirá na percepción de 145.000 pesetas mensuais como máximo, desde o día 1 de setembro ata o 31 de decembro de 1995, sen prexuízo de que sexa prorrogada por un período de doce meses, en función do aproveitamento dos adxudicatarios, das necesidades de asistencia e colaboración nas tarefas encomendadas, e das dispoñibilidades orzamentarias.

Terceira.-Requisitos.

-Ser cidadán español, con veciñanza en Galicia.

-Te-lo título de licenciado en filoloxía galega.

Cuarto.-Solicitudes e prazo de presentación.

1. As solicitudes, segundo o modelo que figura ó final desta convocatoria, enviaranse á EGAP, polígono das Fontiñas, rúa de Madrid, 2-4, 15703 Santiago de Compostela, conforme ós requisitos establecidos no artigo 38 da Lei 30/1992, do 26 de novembro, xunto coa seguinte documentación:

-Fotocopia do DNI ou pasaporte.

-Certificación académica, con detalle das cualificacións obtidas na carreira.

-Declaración expresa de non ter contraída ningunha débeda coa Xunta de Galicia.

-Currículum vitae.

-Memoria descritiva do proxecto de estudio e colaboración en materia de linguaxe administrativa galega nun centro de formación de funcionarios públicos.

Os documentos deberán ser orixinais ou copias cotexadas con eles.

2. O prazo de presentación de instancias é de 20 días naturais, contados desde o seguinte ó da publicación desta convocatoria no Diario Oficial de Galicia.

Quinta.-Selección.

Estará a cargo dun tribunal presidido polo secretario xeral da EGAP, do que formarán parte, como vocal, un experto en filología galega. Actuará como secretario, o xefe do Servicio de Estudios, Investigación e Publicacións.

O tribunal estudiará, avaliará e relacionará por orde de puntuación os expedientes dos solicitantes admitidos, formados polas solicitudes e documentación xustificativa.

O tribunal poderá convoca-los candidatos a unha entrevista persoal e/ou a unha proba obxectiva, orientada a verifica-lo coñecemento dos interesados sobre o obxecto en que se centra esta convocatoria.

O correspondente tribunal está clasificado na categoría primeira, segundo o artigo 26 do Decreto 299/1990, do 24 de maio.

Na hipótese de que a persoa renunciase á bolsa, a súa adxudicación recaería automaticamente na que a siga en puntuación, e así sucesivamente.

Sexta.-Obrigas dos bolseiros.

1. Acepta-la bolsa e incorporarse ás tarefas asignadas dentro dos dez días seguintes ó da notificación do outorgamento. De non facelo así, sen causa abonda a xuízo do director, a EGAP poderá chama-lo seguinte ou seguintes candidatos por orde de puntuación, da relación formada para este efecto polo tribunal.

2. Permanecer asiduamente en horario lectivo de luns a venres, en sesións de mañá e/ou de tarde, nas instalacións que para estudio e investigación

ten habilitadas a EGAP; horario que determinará o xefe do Servicio de Estudios, Investigación e Publicacións.

3. Atende-las instruccións que dicte o xefe do Servicio de Estudios, Investigación e Publicacións.

4. Presta-la súa colaboración en cantas actividades garden conexión co estudio obxecto desta convocatoria e que contribúan á realización do fin perseguido por ela.

5. Cubri-los informes ou partes de actividade que se lle requiran.

Sétima.-Dereitos dos bolseiros.

1. A perceción mensual na súa conta corrente, do líquido que resulte de aplicarlle á mensualidade íntegra de 145.000 ptas. a retención fiscal que proceda.

2. Os adxudicatarios adquiren exclusivamente a condición de bolseiros, coas obrigas e dereitos propios dela, conforme a estas bases, sen ningún outro vínculo laboral ou administrativo.

Santiago de Compostela, 23 de maio de 1995.

Xaime Rodríguez-Arana Muñoz

Director da Escola Galega de Administración Pública