A importancia da comunicación oral e escrita, das telecomunicacións e das novas tecnoloxías, como instrumentos de vertebración dun país, e como ferramentas útiles para facilitar, mediante o achegamento entre os pobos, o afondamento da democracia, fan especialmente recomendable un mellor coñecemento desas técnicas.

A conciencia desa necesiade levou á inclusión nos orzamentos xerais da Comunidade Autónoma dos créditos destinados á realización de investigacións nese campo.

Coa finalidade de asegura-la publicidade e obxectividade na concesión, así como para promove-la participación,

DISPOÑO:

Primeiro

Establécense axudas para fomenta-la realización de estudios sobre medios de comunicación, telecomunicacións e novas tecnoloxías. O importe global das axudas será de catorce millóns de pesetas (14.000.000 ptas.)

Segundo

A contía de cada axuda será de cincocentas mil a un millón de pesetas (500.000 a 1.000.000 de ptas.)

Terceiro

Poderán solicita-las axudas particulares e entidades sen fin de lucro.

Cuarto

A solicitude das axudas farase mediante instancia dirixida ó secretario xeral de Comunicación, e irá acompañada da seguinte documentación:

a) Copia legalizada do documento nacional de identidade do solicitante.

b) Acreditación da representación con que actúa, se é o caso.

c) Memoria explicativa do contido, con indicación da súa dimensión e prazo de realización.

d) Currículum vitae do autor ou autores do estudio.

Quinto

As solicitudes serán presentadas no rexistro xeral da Xunta de Galicia, sito na planta baixa do edificio administrativo nº 1 -central- de San Caetano, en Santiago de Compostela, ou nos das súas delegacións provinciais. Tamén se poderán remitir en calquera das formas previstas no artigo 38.4 da Lei de réxime xurídico das administracións públicas e do procedemento administrativo común, no prazo de trinta días naturais, contados a partir da publicación da presente orde no Diario Oficial de Galicia.

Sexto

Os estudios presentaranse por triplicado, debidamente foliados e encadenados, e coa sinatura do autor ou autores. A súa extensión non será inferior ós 100 folios de 1.800 caracteres, e non se computarán as copias íntegras parciais das publicacións ou estudios xa existentes.

Sétimo

A concesión das axudas será realizada polo secretario xeral de Comunicación, por proposta dunha Comisión integrada por un funcionario da devandita Secretaría Xeral con categoría non inferior a xefe de servicio, o enxeñeiro de telecomunicacións e o director da oficina de prensa. A comisión terá en conta a finalidade do estudio e a súa relación coa realidade galega na materia, o seu carácter inédito, o currículum vitae do autor ou autores e calquera outra circunstancia que contribúa á modernización do sector.

A resolución respecto da presente liña de subvencións será notificada a tódolos solicitantes transcorridos tres meses desde o remate do prazo de presentación de solicitudes. Esgotado o devandito prazo sen resolución expresa, deberá entenderse desestimada a petición correspondente en sentido contrario (artigo 43-2º c), da Lei 30/1992, do 26 de novembro, de réxime xurídico das administracións públicas e do procedemento administrativo común.

Oitavo

Os estudios resultantes das memorias seleccionadas serán entregados na Secretaría Xeral de Comunicación antes do día 30 de setembro de 1995.

Noveno

A concesión das axudas farase con cargo á aplicación 04.07.361.A.480.00 que figura no proxecto de orzamentos xerais da Comunidade Autónoma para 1995.

Décimo

O pagamento tramitarase unha vez entregado o estudio obxecto da axuda.

Con independencia da súa contía e antes de proceder ó seu cobro, os beneficiarios das subvencións terán que acreditar que se atopan ó día nas súas obrigas tributarias e sociais e que non teñen pendente de pagamento ningunha débeda por ningún concepto coa Administración pública da Comunidade Autónoma.

Décimo primeiro

De non entregarse o estudio no prazo sinalado, ou de entregarse cun contido distinto ó previsto na memoria, o beneficiario perderá o seu dereito á percepción da axuda.

Décimo segundo

A Secretaría Xeral de Comunicación reserva para si o dereito de publica-los traballos presentados baixo esta convocatoria.

Disposición derradeira

Nos aspectos non contidos na presente orde, haberá que aterse ó disposto no artigo 78 da Lei 11/1992, de réxime financeiro e presupostario de Galicia.

Santiago de Compostela, 3 de marzo de 1995.

P.D. (Orde 26-3-1992)

Jesús Pérez Varela

Secretario xeral de Comunicación