Con data 2 de febreiro de 1995 publicouse no Diario Oficial de Galicia a orde da Consellería da Presidencia e Administración Pública do 17 de xaneiro de 1995 pola que se clasifica como mixta a Fundación para o Desenvolvemento da Comarca de Arzúa, adscribíndoa á Consellería da Presidencia e Administración Pública, que terá que exercer plenamente o protectorado sobre ela.

O padroado da fundación, en sesión extraordinaria celebrada o día 19 de decembro de 1994, adoptou por unanimidade acordo de modifica-los artigos 17.1, 17.2 e 17.5 dos estatutos, engadindo ademais un novo artigo 23.bis), que integrará a sección terceira do capítulo IV, do consello asesor, e faculta-lo presidente, vicepresidente e o secretario da fundación para que calquera deles, indistintamente, eleven a públicos os acordos tomados.

Esta fundación, ó abeiro do establecido no artigo 5 dos seus estatutos, ten por obxecto pór en marcha as accións xenéricas enunciadas no Plan de Desenvolvemento Comarcal, desdeñando programas, solicitando a súa implementación ós organismos correspondentes e animando e incentivando a participación dos sectores e axentes económicos e sociais ós que vai dirixido.

Por todo iso, e en virtude das competencias que me confire o artigo 34.12º da Lei 1/1983, do 22 de febreiro, reguladora da Xunta e do seu presidente, e segundo o establecido nos artigos 8 da Lei 7/1983, do 22 de xuño, de réxime das fundacións de interese galego, modificada pola Lei 11/1991, do 8 de novembro, e 32.3º do Decreto 248/1992, do 18 de xuño, polo que se aproba o réxime de organización e funcionamento do protectorado das fundacións de interese galego,

DISPOÑO:

Artigo único.

1.-Declarar de interese galego a Fundación para o Desenvolvemento da Comarca de Arzúa, ó cumpriren os seus estatutos as prescricións que para tal efecto sinala a vixente lexislación en materia de fundacións de interese galega.

2.-Ordena-la inserción da Fundación para o Desenvolvemento da Comarca de Arzúa no Rexistro de Fundacións de Interese Galego, sección da Consellería da Presidencia e Administración Pública, para os efectos constitutivos que sinala a Lei 7/1983, do 22 de xuño, do réxime das fundacións de interese galego, modificada pola Lei 11/1991, do 8 de novembro.

Disposición derradeira

A presente orde entrará en vigor o mesmo día da súa publicación no Diario Oficial de Galicia.

Santiago de Compostela, 14 de febreiro de 1995.

Dositeo Rodríguez Rodríguez

Conselleiro da Presidencia e Administración Pública