O 18 de xullo de 2017, a Consellería do Medio Rural publicou a Orde do 7 de xullo de 2017 (DOG núm. 136, do 18 de xullo de 2017) pola que establecen as bases reguladoras da concesión, en réxime de concorrencia competitiva, das axudas para a execución de proxectos dos grupos operativos da Asociación Europea da Innovación (AEI), cofinanciadas co Fondo Europeo Agrícola de Desenvolvemento Rural (Feader) no marco do PDR de Galicia 2014-2020, e se convocan para o ano 2017.
O punto 2 do artigo 22 da dita orde regula o prazo para xustificar a subvención conforme a anualidade establecida na resolución da concesión e solicitar os correspondentes pagamentos parciais da subvención, con datas límite do 31 de outubro nas anualidades 2017, 2018 e 2019, salvo casos excepcionais debidamente autorizados polo órgano xestor de acordo co artigo 45.3 do Decreto 11/2009, logo da petición do beneficiario.
Pola complexidade da análise das solicitudes, o proceso administrativo de resolución das axudas concedidas ao abeiro da Orde do 7 de xullo de 2017 pode delongarse no tempo de tal xeito que a data de resolución podería ser posterior á data de xustificación inicialmente prevista para 31 de outubro de 2017. Por esta circunstancia é necesario modificar a referida data de xustificación prevista no número 2 do artigo 22 da Orde do 7 de xullo de 2017.
En consecuencia, de conformidade co previsto no artigo 30.1.3 do Estatuto de autonomía de Galicia e no uso das facultades que me confire a Lei 9/2007, do 13 de xuño, de subvencións de Galicia, de acordo co disposto na Lei 1/1983, do 22 de febreiro, reguladora da Xunta e da súa Presidencia, e demais normativa concorrente,
DISPOÑO:
Artigo único
Modificación da Orde do 7 de xullo de 2017 (DOG núm. 136, do 18 de xullo de 2017) pola que se establecen as bases reguladoras da concesión, en réxime de concorrencia competitiva, das axudas para a execución de proxectos dos grupos operativos da Asociación Europea da Innovación (AEI), cofinanciadas co Fondo Europeo Agrícola de Desenvolvemento Rural (Feader) no marco do PDR de Galicia 2014-2020, e se convocan para o ano 2017.
Modifícase o primeiro parágrafo do número 2 do artigo 22, que queda redactado do seguinte xeito:
«As entidades beneficiarias deberán xustificar a subvención conforme a anualidade establecida na resolución da concesión e solicitar os correspondentes pagamentos parciais da subvención, coa data límite do 30 de novembro na anualidade 2017 e do 31 de outubro nas anualidades 2018 e 2019, salvo casos excepcionais debidamente autorizados polo órgano xestor de acordo co artigo 45.3 do Decreto 11/2009, logo da petición do beneficiario».
Disposición derradeira. Entrada en vigor
Esta orde producirá efectos o día seguinte ao da súa publicación no Diario Oficial de Galicia.
Santiago de Compostela, 20 de outubro de 2017
Ángeles Vázquez Mejuto
Conselleira do Medio Rural