No Diario Oficial de Galicia núm. 247, do 29 de decembro de 2015, publicouse a Resolución do 28 de decembro de 2015 pola que se lle dá publicidade ao acordo do Consello de Dirección do Instituto Galego de Promoción Económica que aproba as bases reguladoras das axudas aos proxectos de investimento empresarial, cofinanciadas polo Fondo Europeo de Desenvolvemento Rexional, no marco do programa operativo Feder Galicia 2014-2020, e se procede á súa convocatoria en réxime de concorrencia non competitiva.

Mediante Resolución do 9 de maio de 2016 déuselle publicidade ao acordo do Consello de Dirección polo que se modificaron as bases reguladoras das axudas aos proxectos de investimento empresarial, cofinanciadas polo Fondo Europeo de Desenvolvemento Rexional, no marco do programa operativo Feder Galicia 2014-2020 (DOG núm. 93, do 18 de maio).

Na letra b) do punto un do artigo 1 da Resolución do 9 de maio de 2016 establécese que o prazo de presentación de solicitudes rematará cando se produza a primeira das seguintes circunstancias:

a) Que, conforme as solicitudes recibidas, se esgote o crédito orzamentario.

b) O 30 de decembro de 2016.

Unha vez finalizado o prazo, non se admitirán máis solicitudes. Non obstante o anterior, no suposto de existir remanente de crédito cando finalice o prazo, mediante acordo do Consello de Dirección, que se publicará no Diario Oficial de Galicia e na páxina web do Igape, poderase ampliar o prazo anterior co límite do 31 de marzo de 2017.

Tendo en conta as solicitudes presentadas ata o momento e a previsión de solicitudes ata o 31 de decembro, non parece previsible a utilización do crédito cando finalice o prazo.

O Consello de Dirección do Igape, na súa xuntanza do 22 de decembro de 2016, acordou ampliar o prazo de presentación de solicitudes das bases reguladoras das axudas aos proxectos de investimento empresarial, cofinanciadas polo Fondo Europeo de Desenvolvemento Rexional, no marco do programa operativo Feder Galicia 2014-2020.

Por todo o anterior, de conformidade co disposto no artigo 32 da Lei 39/2015, do 1 de outubro, do procedemento administrativo común das administracións públicas, e dado que non se causan prexuízos a terceiros,

RESOLVO:

Artigo 1

Ampliar ata o 31 de marzo de 2017, inclusive, o prazo de presentación de solicitudes previsto na letra b) do punto un do artigo 1 da Resolución do 9 de maio de 2016 mediante a que se lle deu publicidade ao acordo do Consello de Dirección polo que se modificaron as bases reguladoras das axudas aos proxectos de investimento empresarial, cofinanciadas polo Fondo Europeo de Desenvolvemento Rexional, no marco do programa operativo Feder Galicia 2014-2020.

Artigo 2

Esta resolución entrará en vigor o mesmo día da súa publicación no Diario Oficial de Galicia.

Santiago de Compostela, 22 de decembro de 2016

Juan Manuel Cividanes Roger
Director xeral do Instituto Galego de Promoción Económica