Dentro do plan de actividades da Escola Galega de Administración Pública para o ano 2015 e de acordo coas funcións atribuídas pola Lei 4/1987, do 27 de maio, de creación da Escola, modificada pola Lei 10/1989, do 10 de xullo, convócase un curso monográfico sobre comunicación efectiva para xestores de equipos: negociación e traballo en equipo, conforme as seguintes bases:

1. Obxectivos.

Os obxectivos xerais deste curso son:

• Introducir aspectos básicos relacionados coa xestión de persoas, o liderado e a resolución de conflitos.

• Traballar con ferramentas básicas da comunicación que permitan unha mellor xestión do traballo en equipo e dos conflitos no contorno laboral no eido da Administración local.

• Achegar, a través do autocoñecemento e da comunicación, as competencias fundamentais para xestionar un equipo e negociar con efectividade.

2. Contidos.

Serán tratados, entre outros, os seguintes temas:

1. Que tipo de líder son? Autocoñecemento e liderado persoal.

• Estilos de liderado.

• Autocoñecemento e liderado persoal.

• A xestión de persoas e a observación.

• Como me comunico.

2. A comunicación no equipo.

• Aptitudes emocionais intrapersoais e interpersoais.

• Habilidades sociais para o traballo en equipo.

• A escoita activa, a empatía e a asertividade.

3. Como facer que o noso equipo funcione?

• Como se configura un equipo? As fases.

• Motivación.

• Definición de obxectivos.

• Algunhas técnicas de traballo en equipo.

4. Como resolver conflitos? A Negociación.

• Tipos de conflitos: descrición, emocións asociadas, a solución e a avaliación.

• Actitudes proactivas e reactivas: a flexibilidade como ferramenta para a xestión dos conflitos.

• Estratexias para a negociación.

5. Caso práctico: o traballo en equipo desde dentro.

• Estudo de ferramentas específicas para o liderado persoal, o traballo en equipo e a negociación e xestión de conflitos.

• Dinámicas dirixidas para o caso práctico: o traballo en equipo desde dentro.

• Conclusións e valoración da formación.

3. Destinatarios.

Empregados das administracións públicas de Galicia, tanto autonómica coma local e de xustiza, das universidades do Sistema universitario de Galicia, persoal das entidades do sector público, xuristas, profesionais e interesados en xeral.

4. Desenvolvemento.

Lugar: EGAP, rúa Madrid, 2-4, Santiago de Compostela.

Datas: os mércores 14, 21 e 28 de outubro, e 4 e 11 de novembro de 2015.

Horario: das 17.00 ás 20.00 horas.

Duración: 15 horas lectivas.

5. Número de prazas.

Número de prazas: 30.

O orden de admisión virá determinado pola data de presentación das solicitudes.

6. Inscrición.

As persoas interesadas deberán formalizar a súa inscrición a través da área de matrícula da web da EGAP: https://egap.xunta.es/matricula/

O prazo para inscribirse estará aberto desde o día seguinte ao da publicación desta resolución no Diario Oficial de Galicia ata o 9 de outubro de 2015.

Poderá obterse calquera outra información, das 8.30 ás 14.30 horas, nos teléfonos: 981 54 62 41 e 981 54 62 39.

7. Modificacións.

A EGAP reserva para si a facultade de interpretar e de resolver as incidencias que poidan xurdir no desenvolvemento deste curso, así como a facultade de cancelalo se o escaso número de solicitudes non xustificase a súa realización.

8. Certificado de asistencia oficial.

Ao final do curso entregarase un certificado de asistencia a aquelas persoas inscritas que tivesen participado asiduamente e sempre que a súa asistencia fose igual ou superior ao 90 % das horas lectivas programadas. Neste documento aparecerán, de forma expresa, o contido, a carga lectiva, a data, o lugar de realización deste curso e o selo oficial da institución.

Santiago de Compostela, 17 de outubro de 2015

Sonia Rodríguez-Campos González
Directora da Escola Galega de Administración Pública