A vicepresidenta segunda e conselleira de Medio Ambiente, Territorio e Vivenda en funcións asinou o convenio de adhesión coa empresa
A Alianza polo clima promovida pola Xunta suma o apoio de Iberconsa para seguir creando sinerxías na loita contra o quecemento global
Ángeles Vázquez incide na importancia do apoio de Iberconsa a esta acción pioneira que busca conectar ao tecido produtivo e social galego de cara a facer máis resiliente á Comunidade e establecer pautas de actuación para alcanzar a neutralidade climática
A Alianza galega polo clima, promovida pola Xunta, sumou o apoio de Grupo Ibérico de Conxelados (Iberconsa) co obxectivo de seguir creando sinerxías na loita contra o quecemento global, tal e como explicou a vicepresidenta segunda e conselleira de Medio Ambiente, Territorio e Vivenda en funcións, Ángeles Vázquez, durante a sinatura do convenio de adhesión co director executivo da empresa, Alberto Freire.
Logo de salientar que esta Alianza conta xa con preto de 120 entidades adheridas -universidades, autoridades portuarias, clubs deportivos ou empresas-, Ángeles Vázquez incidiu na importancia do apoio de Iberconsa a esta “acción pioneira” que ten como obxectivo conectar ao tecido produtivo e social galego de cara a traballar contra o quecemento global, facer máis resiliente á Comunidade e establecer pautas de actuación para alcanzar a neutralidade climática.
Nesa liña, segundo lembrou a vicepresidenta segunda en funcións, a adhesión a esta Alianza supón asumir as liñas estratéxicas marcadas polo Goberno galego nesta materia e unha serie de deberes como establecer accións dirixidas á adaptación ou mitigación do cambio climático en Galicia; fomentar o intercambio de información científica, tecnolóxica, socioeconómica ou xurídica sobre este tema; promover e apoiar a investigación vinculada ao clima, e acelerar o desenvolvemento e a difusión de tecnoloxía para a transición cara a sistemas de enerxía de baixas emisións.
Ángeles Vázquez subliñou a relevancia da adhesión de Iberconsa a esta Alianza que nos permitirá ser máis fortes na loita contra o cambio climático ao ser un referente no ámbito da pesca con 40 anos de experiencia e con presenza nos 5 continentes. Con esta sinatura Iberconsa “reforza o seu compromiso cunha pesca sostible e compatible co medio ambiente”, engadiu.
A maiores, Ángeles Vázquez puxo en valor que se trata dunha compañía clave na puxanza da industria pesqueira galega, ao dar emprego a máis de 520 familias e xerar riqueza por valor de máis de 400 millóns de euros.
Fitos acadados e desenvolvemento lexislativo
Cómpre lembrar que Galicia leva anos traballando para mellorar a súa capacidade de resiliencia ante o cambio climático. De feito, xa acadou fitos decisivos como ser a segunda comunidade que máis reduciu as emisións de gases de efecto invernadoiro en 2021 ou a redución dun 34% de emisións brutas de GEI respecto a 1990 -ano que se toma de referencia-, máis de 34 puntos porcentuais por enriba da media nacional.
Ademais, 1 de cada 5 toneladas de carbono que se absorben en España faise en Galicia-9,7 millóns de toneladas en 2021-, o que a converte na primeira comunidade do Estado nesta materia.
Nesa liña, a Xunta, ademais de publicar recentemente a Guía de contratación pública ecolóxica, está a desenvolver a que será a primeira lei do clima de Galicia, co obxectivo de acadar a neutralidade climática en 2040. E de cara a avanzar nese obxectivo, este ano porá en marcha o servizo de asesoramento técnico ‘Galicia Resiliente’, que orientará tanto a entidades públicas como privadas sobre medidas ou proxectos para adaptarse aos efectos do cambio climático.
Imaxes relacionadas
