A Xunta licita por 463.000 euros a execución das obras da 1ª fase do saneamento na parroquia de Monteagudo, no concello de Arteixo
O obxectivo é dotar de servizo de saneamento á totalidade das vivendas de Monteagudo, conectándoas coa rede existente
As intervencións reforzarán o sistema de saneamento nos núcleos de Monteagudo, O Coto, Vilela, A Rocha, A Perillona, A Ibia, O Freixal, A Casanova e Ramilo
As obras enmárcanse no convenio de colaboración polo que a Xunta financiará o 80% dos traballos, coa achega de 436.000 €, e o Concello o 20% restante, con 109.000 €
Santiago de Compostela, 8 de febreiro de 2023
A Consellería de Infraestruturas e Mobilidade, a través de Augas de Galicia, licitou hoxe por 463.352 euros, as obras de execución da primeira fase do saneamento na parroquia de Monteagudo, no concello de Arteixo
A Plataforma de Contratos Públicos de Galicia publica hoxe esta contratación, á que as empresas interesadas poderán presentar as súas ofertas ata o día 8 de marzo. As obras teñen un prazo de execución de 5 meses.
A actuación ten como obxectivo dotar de servizo de saneamento á totalidade das vivendas da parroquia de Monteagudo, enlazando coa rede existente.
A solución proxectada é unha rede de ramais de saneamento que colecte as augas residuais das vivendas non conectadas actualmente á rede municipal.
As obras prevén dar servizo ás vivendas situadas na parte alta do núcleo mediante a execución dun novo colector que se conecte coa rede existente, substituíndo o actual, que presenta problemas de cotas.
No núcleo do Coto conectarase a rede de colectores coa rede existente.
En Vilela, A Rocha, A Perillona e A Ibia, executaranse ramais que dotarán de conexión o bombeo existente na área recreativa dos Barreiros. Existe un cruzamento co rego das Ibias, que precisará da execución dun bombeo previo para salvar o cruce.
No núcleo do Freixal acometerase un ramal que conectará coa rede existente por gravidade.
Finalmente, nos núcleos da Casanova e Ramilo, prevense dous ramais de colectores por gravidade que confluirán no punto baixo onde se proxecta un bombeo que o conectará coa rede existente.
Estes traballos enmárcanse no convenio de colaboración entre Augas de Galicia e o Concello de Arteixo, cun orzamento de 545.000 euros. A Xunta achega o 80% do investimento, 436.000 euros; e o Concello financiará o 20% restante, 109.000 euros.
A execución dos traballos será cofinanciada pola Unión Europea a través do Fondo Europeo Agrícola de Desenvolvemento Rural (FEADER), no marco do Programa de Desenvolvemento Rural (PDR) Galicia 2014-2020.
