A Xunta comezará a vindeira semana traballos de limpeza nas marxes da estrada OU-531 entre Xinzo de Limia e Cortegada
Continuarán as tarefas en marcha na autovía AG-64, en Narón e San Sadurniño; ou na vía de altas prestacións CG-2.1, ao paso por Monforte de Lemos, Pantón e O Saviñao
Na provincia de Ourense avanzarán as intervencións na OU-536, no Pereiro de Aguiar; e na OU-504 en Leiro
Proseguirán as actuacións en vías autonómicas da comarca do Morrazo
Estas tarefas forman parte do contrato con Seaga para o control da biomasa das marxes das estradas autonómicas
Santiago de Compostela, 4 de febreiro de 2024
A Xunta comezará a vindeira semana novos traballos de limpeza nas marxes da estrada OU-531 entre Xinzo de Limia e Cortegada.
Tamén proseguirán actuacións xa en marcha como as da autovía AG-64, nos concellos de Narón e de San Sadurniño.
No caso da provincia de Lugo continuarán as tarefas na vía de altas prestacións CG-2.1 ao seu paso polos concellos de Monforte de Lemos, Pantón e O Saviñao.
Na provincia de Ourense avanzarán as intervencións na OU-536, no Pereiro de Aguiar; e na OU-504 en Leiro.
Tamén continuarán os traballos de roza na provincia de Pontevedra, neste caso centrándose en vías da comarca do Morrazo: na autovía AG-46, en Moaña e Cangas; na CG-4.1, que une tamén os municipios de Moaña e Cangas; e na vía de altas prestacións VG-4.6, que comunica os municipios de Cangas e de Bueu.
Estas intervencións enmárcanse no novo contrato coa empresa pública Seaga para o control da biomasa das marxes das estradas autonómicas.
Os obxectivos deste programa son previr o risco de lumes e contribuír ao reforzo da seguridade viaria mediante o aumento da visibilidade e as accións para facilitar o tránsito de vehículos, de peóns e de ciclistas.
Imaxes relacionadas
