Poio (Pontevedra), 28 de xaneiro de 2024

A vicepresidenta segunda e conselleira de Medio Ambiente, Territorio e Vivenda, Ángeles Vázquez, animou hoxe ao conxunto da cidadanía galega a coñecer os 49 sendeiros azuis cos que conta Galicia e a gozar das paisaxes e da biodiversidade existentes na súa contorna.

A responsable autonómica percorreu un tramo da senda do Laño, en Poio, que foi incluída este ano na lista de sendeiros azuis elaborada pola Asociación de Educación Ambiental e do Consumidor (Adeac) e que busca poñer en valor o papel das sendas e camiños como recurso valioso para gozar da natureza, realizar actividades deportivas e de lecer ao aire libre así como aprender a interpretar ambientalmente estes espazos.

A vicepresidenta segunda, que estivo acompañada polo alcalde de Poio, Ángel Moldes, polo delegado territorial da Xunta en Pontevedra, Agustín Reguera, e pola directora xeral de Patrimonio Natural, Belén do Campo, agradeceu o compromiso dos concellos e do resto de administracións coa recuperación e difusión destes itinerarios naturais.

De feito, o Concello de Poio conta este ano con catro sendeiros azuis, o dobre que en 2023, pois ao Sendeiro litoral de Poio e á Variante espiritual do Camiño Portugués sumáronse a Senda do Laño e a Ruta dos muíños de Samieira.  

Precisamente, Ángeles Vázquez lembrou que Galicia conta este ano con 49 distintivos, 14 máis que o ano pasado, co que a comunidade concentra case catro de cada dez dos 128 recoñecementos outorgados en toda España. Desa rede nacional de sendeiros, que supera os 850 quilómetros, Galicia aporta preto de 320 quilómetros.