O conselleiro do Medio Rural, José González, acompañado do director xeral de Defensa do Monte, Manuel Rodríguez, o director da Axencia Galega da Industria Forestal, Jacobo Aboal, e o alcalde de Rianxo, Julián Bustelo, realizou hoxe unha visita técnica á futura Base de Unidade Operativa (BUO) da localidade coruñesa.

Esta nova construción, que abrangue unha superficie de máis de 2.000 metros cadrados, contará cunha edificación de 263,65 metros cadrados e de planta baixa, para que o persoal do servizo de prevención e extinción de incendios poida conciliar traballo e descanso.

A edificación de Rianxo estará fragmentada en tres ás en forma de estrela, cunha aberta e as outras dúas consistentes nuns volumes pechados. Isto minimizará a dureza da edificación, desenvolvendo unha forma orgánica máis vencellada co lugar.

Nesta obra estanse a empregar materiais ecolóxicos e reciclables, como son a madeira con selos FSC/PEFC -especialmente castiñeiro galego para a estrutura principal-, cortiza, vidro e aceiro, facendo destas instalacións edificacións bioclimáticas e coa máxima certificación enerxética. O uso da madeira na súa estrutura cobra especial importancia e ademais dos mencionados selos, tamén se empregará “Piñeiro de Galicia”.

A base disporá dunha área exterior cuberta de aparcadoiro para os vehículos do dispositivo. Así mesmo, no interior contan con circuítos de traballo, con vestiarios e duchas e, de xeito independente, zona de aseos. Na zona de estancia e descanso cóntase con dúas zonas de cociña, comedor e elementos de descanso, ademais dunha pequena área de despacho para a xestión da base.