A Xunta publica o marco específico para que as universidades galegas poidan implantar graos e másteres duais a partir do vindeiro curso
O Diario Oficial de Galicia publica hoxe estas instrucións, que supoñen o primeiro modelo autonómico existente en España
O obxectivo é que conten cunha guía de actuación clara e con criterios homoxéneos para impulsar a creación de titulacións que melloren a empregabilidade
Santiago de Compostela, 17 de xaneiro de 2024
A Xunta publica hoxe no Diario Oficial de Galicia os requisitos básicos para que as universidades galegas poidan implantar graos duais a partir do vindeiro curso. O obxectivo é crear un marco específico de referencia, unha guía clara que especifique unha serie de liñas de actuación mínimas e homoxéneas para garantir a calidade e oportunidade das propostas que realicen estas entidades académica para a posta en marcha de mencións duais, buscando dar pulo a estas titulacións, dado o seu valor para mellorar a empregabilidade do alumnado.
Deste xeito, as instrucións sobre a documentación que debe presentar unha universidade para solicitar a verificación dun título oficial de grao ou máster universitario con mención dual buscan orientar aos centros universitarios no proceso interno de elaboración, revisión e modificación das propostas de mencións duais, que incorporen as memorias de verificación dos seus título. Aplicaranse ás novas solicitudes de verificación así como a aquelas que estean en trámite.
Entre a documentación mínima, cada universidade deberá concretar a relación de entidades colaboradoras seleccionadas para posta en marcha da mención dual pola súa dispoñibilidade de recursos materiais, infraestruturas e servizos adecuados, así como as accións encamiñadas a dotalas de capacidades e ferramentas adecuadas para xestionar correctamente o proceso de aprendizaxe do estudantado.
Primeiro modelo autonómico
Deste xeito, configúrase un marco normativo que permita sistematizar para o Sistema Universitario de Galicia un procedemento único regrado para a implantación das titulacións duais que, á súa vez, confira seguridade a estudantes e empresas colaboradoras. Este marco específico é o primeiro modelo autonómico para titulacións universitarias duais e constitúe un modelo sistematizado e integral que vai máis aló da experiencia desenvolvida pola Universidade de Mondragón neste eido.