Ourense, 13 de xaneiro de 2024

A conselleira de Promoción do Emprego e Igualdade, Elena Rivo, acompañada do delegado territorial da Xunta en Ourense, Gabriel Alén, participou hoxe na xornada Ferramentas prácticas para o liderado feminino, a mellora profesional e a xestión de equipos organizada na Confederación Empresarial de Ourense (CEO) no marco do programa da Xunta Lideramos, que promove o talento e a mellora da xestión de equipos, no que toman parte 150 mulleres das catro provincias, unha trintena da provincia de Ourense.

A representante autonómica puxo en valor a experiencia das participantes nesta iniciativa que promove eliminar fendas de xénero e fortalecer a creación de novos perfís profesionais, motivar e crear cadros de persoal diversos.

Rivo defendeu que Galicia está a referendar o seu compromiso coa igualdade de xénero, apostando polo liderado feminino e pola competencia da xestión executiva. Programas como Lideramos, dixo, favorecen a interrelación entre as participantes, mellorando as capacidades de liderado e comunicación, destacando as fortalezas e talentos individuais.

Do mesmo xeito, promóvese o autocoñecemento e o desenvolvemento persoal mediante sesións de coaching individualizadas. Coñecer as principais forzas motivadoras dos equipos é fundamental para alentalos a seguir progresando, indicou a titular de Promoción do Emprego.

O acto de hoxe enmárcase no programa de actividades do programa Lideramos que arrancou na última semana de decembro en Pontevedra e seguirá o seu curso con accións programadas ata o 11 de abril nas catro provincias.

A Xunta de Galicia, lembrou a conselleira, seguirá a apoiar en 2024 as novas iniciativas empresariais, xeradoras e consolidadoras de emprego.  “Queremos unha Galicia próspera e igualitaria, onde podamos axudar a calquera persoa que persiga o soño de ter o seu propio negocio”, indicou.

Entre outras actuacións, a Administración autonómica seguirá a avogar polo apoio ao emprendemento feminino a través do programa Emega que cumpre este 2024 o seu 28 aniversario, para promover proxectos liderados por mulleres que xeran e axudan a manter empregos de mulleres tamén.

Os orzamentos da Consellería de Promoción do Emprego e Igualdade para este ano prevén ademais un investimento de máis de 2,2 millóns de euros para fomentar a presenza feminina en profesións fortemente masculinizadas. En paralelo, seguirase a apostar pola conciliación e a corresponsabilidade na vida familiar, persoal e laboral, con medidas para o impulso da corresponsabilidade e o fomento da Responsabilidade Social Empresarial (RSE) nas empresas.

“Como sociedade aspiramos a unha Galicia equilibrada en liderado e talentos, que explote ao máximo todos os recursos humanos en todos os ámbitos”, rematou Rivo.