A vicepresidenta segunda e conselleira de Medio Ambiente, Territorio e Vivenda, Ángeles Vázquez, acompañada do delegado territorial da Xunta en Pontevedra, Agustín Reguera, visitou hoxe o antigo centro de saúde de Cerdedo-Cotobade logo de que fose rehabilitado para ser destinado a vivendas protexidas de titularidade municipal.

A actuación, que respectou a estética orixinal da fachada do edificio e mantivo o volume construtivo, deu lugar a catro vivendas, que veñen incrementar o parque público residencial da localidade. Máis polo miúdo, na planta baixa localízanse dúas vivendas de 130 m² con tres dormitorios mentres que no andar superior hai dúas vivendas de un dormitorio cada unha.

As vivendas, que foron adxudicadas a catro familias da localidade en base ás circunstancias de dificultade de orde económica ou social, están totalmente equipadas, con armarios encaixados e cociña amoblada cos electrodomésticos. Contan con calefacción e auga quente mediante bomba de calor. Cómpre salientar tamén que todas teñen acceso independente a través do soportal exterior e cada unha conta cunha praza de garaxe e xardín.