A Xunta adxudica 24.400 metros cadrados de solo empresarial en cinco concellos con máis de 1,1 m€ de bonificación
Os terreos corresponden a 13 parcelas polas que as empresas pagarán algo máis de 2 M€
A Xunta de Galicia adxudicou a semana pasada máis de 24.400 metros cadrados de solo empresarial agrupado en 13 parcelas dos parques empresariais de Morás (Arteixo), As Gándaras (Lugo), A Reigosa (Ponte Caldelas), Muimenta (Cospeito) e Mos.
O acordo aprobado na comisión executiva da empresa pública Xestur supón que as empresas adxudicatarias dos terreos pagarán por este solo algo máis de 2 millóns de euros, unha vez aplicada unha bonificación de máis de 1,15 millóns de euros.
O Executivo galego adxudicou desde 2015 -ano no que comezou a aplicar bonificacións sobre o prezo do solo empresarial- máis de tres millóns de metros cadrados nos parques promovidos polo Instituto Galego da Vivenda e Solo (IGVS) e Xestur, con bonificacións que superan os 86 millóns de euros.
A Xunta é a única das administracións promotoras de solo empresarial que bonifica o prezo da totalidade do solo que vende, facilitando así o asentamento de empresas e a creación de postos de traballo na súa contorna.
PARQUE | NÚMERO PARCELAS | SUPERFICIE m2 | PREZO € (descontada bonificación) | BONIFICACIÓN € |
Morás (Arteixo) | 2 | 5.166 | 527.965,20 | 226.270,80 |
As Gándaras (Lugo) | 8 | 7.886 | 473.160 | 473.160 |
Muimenta (Cospeito) | 1 | 423 | 16.920 | 16.920 |
Mos | 1 | 6.949 | 744.237,90 | 318.959,10 |
A Reigosa (Ponte Caldelas) | 1 | 4.037 | 268.460,50 | 115.054,50 |
TOTAL | 13 | 24.461 | 2.030.743,60 | 1.150.364,40 |