Santiago de Compostela, 15 de decembro de 2023

A Consellería de Infraestruturas e Mobilidade, a través de augas de Galicia, vén de comezar a execución das obras de mellora do saneamento municipal de Cambados, que suporán un investimento de 1,7 M€.

Os traballos iniciados hoxe conta cun prazo de execución de 15 meses e inclúen a mellora de saneamento no núcleo urbano de Cambados, proxectando novos colectores para crear unha rede separativa en certas concas.

Tamén se inclúe a optimización do sistema na zona do Facho con dúas novas impulsións, así como cunha serie de novos colectores.

A intervención recolle, ademais, a automatización e telecontrol de bombeos principais e a mellora dos bombeos de Fefiñáns e da praza do Concello.

Avance no saneamento da ría de Arousa

Esta actuación é unha das deseñadas pola Xunta para dar un novo impulso ao saneamento da ría de Arousa.

No marco destes proxectos, o Goberno galego iniciou o pasado mes de marzo obras de renovación do sistema de saneamento de Vilagarcía de Arousa, que suporá un orzamento de preto de 10 M€. Tamén se segue a avanzar na mellora da depuradora de Tragove para duplicar a capacidade de tratamento das augas residuais de Cambados, Ribadumia e Vilanova de Arousa, cun investimento de 5,3 M€.

Porén, a falta de autorización de Costas do Estado segue a impedir que se poida executar a outra obra prevista pola Xunta para a mellora do saneamento, o proxecto de mellora do colector que vai de Vilanova de Arousa a Cambados.

Todas estas actuacións son cofinanciadas con fondos europeos do programa Operativo Feder Galicia 2014-2020.

As intervencións están enmarcadas no Plan de saneamento local da ría de Arousa, que está executado xa por riba do 80%, ao permitir coñecer en profundidade os sistemas de saneamento municipais e as súas necesidades e programar os proxectos precisos.