A directora xeral de Xuventude, Participación e Voluntariado, Cristina Pichel, e o delegado territorial de Ourense, Gabriel Alén, participaron hoxe na presentación do evento
A Xunta destaca a importancia do festival internacional Rebulir na difusión da música e do baile tradicional
Desde hoxe e ata o vindeiro domingo, día 17, desenvolverase unha ampla programación de actividades en Ourense, Celanova e Ramirás
A directora xeral de Xuventude, Participación e Voluntariado, Cristina Pichel, e o delegado territorial da Xunta de Galicia en Ourense, Gabriel Alén, participaron hoxe na presentación do Festival Internacional Rebulir (FIR_2023), que este ano celebra a súa décimo oitava edición. No acto tamén estiveron a alcaldesa de Ramirás, Isabel Gil Álvarez, e o director artístico e académico do FIR, Alexandre Sotelino.
Desde hoxe mesmo e ata o vindeiro domingo, día 17, desenvolverase ao abeiro deste festival unha ampla programación en Ourense, Celanova e Ramirás. Entre outras propostas haberá unha feira turística e de promoción, foliadas polas rúas, obradoiros de bailes do mundo, actividades de animación, exposicións ou paneis informativos no Espazo Xove de Ourense, en diversos centros culturais ou na residencia de maiores O Mosteiro, entre outras localizacións. De feito, hoxe pola tarde, no Espazo Xove celebrarase unha charla sobre o audiovisual e un obradoiro de ‘Danzas do Mundo’, cuxas prazas, en ambos casos, están esgotadas.
A gala central terá lugar en Ramirás o sábado, día 16, coa actuación de grupos de música e baile tradicional de Galicia, Estremadura, Portugal, Bolivia e Senegal. Ademais, nesta gala farase entrega dos premios Rebulir 2023 ao actor Luis Zahera, ao músico Xurxo Fernándes e ao programa da Radio Galega 'Lume na palleira’.
A directora xeral e o delegado territorial destacaron que este festival gaña edición tras edición en importancia, consolidándose como un evento de referencia. Neste sentido, aplaudiron o traballo dos organizadores pola recuperación e difusión da música e do baile tradicional.
Imaxes relacionadas
