O director da Axencia Galega da Calidade Alimentaria, José Luis Cabarcos, participou no primeiro taller de cooperación transfronteiriza entre España e Portugal para a promoción da Dieta Atlántica, que se celebrou hoxe en Santiago no marco do proxecto DIETAT, encabezado pola Xunta a través de dita Axencia.

Esta iniciativa, que busca promover a Dieta Atlántica e os seus beneficios para a saúde e o desenvolvemento económico sostible na eurorrexión Galicia-Norte de Portugal para fomentar a creación de novos mercados e oportunidades de acceso ao emprego, traballa na creación dun Observatorio da Dieta Atlántica. Ademais, tamén contempla o establecemento dun selo de calidade no que estean incluídos os seus produtos, así como a promoción de hábitos saudables ou o turismo gastronómico e cultural.

O proxecto DIETAT está liderado pola Axencia Galega da Calidade Alimentaria e participan varias entidades en representación tanto de España como de Portugal. Pola parte española atópanse como beneficiarios a Universidade de Santiago de Compostela, a Fundación Finnova e a Confederación de Empresarios de Galicia. No lado portugués atópanse a Comunidade Intermunicipal de Alto Minho, a Associação Empresarial de Portugal, o Instituto Politécnico de Viana do Castelo e a Universidade de Tras-os-Montes.

Á marxe dos beneficiarios, tamén se atopan outras entidades colaboradoras como socios sen financiamento como son a Axencia de Turismo de Galicia, a Fundación Instituto de Investigación Sanitaria de Santiago de Compostela, a Universidade de Vigo, a Fundación Dieta Atlántica, a Dirección Xeral de Pesca, Acuicultura e Innovación Tecnolóxica da Xunta e a Consellería de Sanidade.

Estratexias para o futuro

Este primeiro taller serviu para reunir a un grupo de entidades expertas na materia que definiron as estratexias de traballo a longo prazo, entre as que se inclúe o Observatorio da Dieta Atlántica. Ademais, realizouse unha análise das distintas oportunidades de financiamento europeo para impulsar as accións derivadas deste posible observatorio.

O director da Axencia Galega da Calidade Alimentaria, José Luis Cabarcos, encabezou esta reunión xunto coa presidenta do Comité Científico da Fundación Dieta Atlántica, Rosaura Leis; o catedrático de Nutrición Humana e Bromatoloxía da Universidade de Santiago, Alberto Cepeda; e o subdirector de Explotación e Stages da Dirección de Profesionalización de Turismo de Galicia, Luis Rial. Entre os asistentes tamén estiveron outros representantes de entidades colaboradoras, tanto de España como de Portugal.