O presidente da Xunta asistiu ao acto de entrega dos galardóns 2023 en Vigo
Rueda destaca que os premios Aproema amosan o compromiso das administracións e empresas galegas na procura dunha Galicia máis verde e sustentable
Asegura que Galicia ten unhas “posibilidades magníficas” para medrar na nova economía verde actual
Defende o coidado e conservación medio ambiental “con sentidiño” , apelando a que é posible ser máis sustentables sen perder a capacidade para ser competitivos e sen renunciar ao desenvolvemento económico
Resalta que a Xunta busca consolidar Galicia como referente na loita contra o quecemento global coa futura Lei do Clima ou a Alianza Galega polo Clima
Vigo, 28 de novembro de 2023
O presidente da Xunta, Alfonso Rueda, destacou hoxe que os premios que cada ano entrega a Asociación Profesional de Empresas Medioambientais de Galicia (Aproema) aos mellores proxectos sostibles da comunidade son o mellor exemplo do compromiso das administracións e empresas galegas na procura dunha Galicia máis verde e respectuosa co medio ambiente.
“Galicia é verde e ten que seguir sendo verde”, defendeu Rueda quen para iso salientou que na actualidade tanto a Administración, sociedade e empresas están “moi concienciadas” de que non se pode medrar a calquera custo. “Sería impensable, unha loucura, un suicidio colectivo”, advertiu.
Galicia, posibilidades magníficas para medrar na economía verde
De feito, fixo fincapé en que a sociedade actual está a vivir unha revolución verde que é unha oportunidade para moitos sectores na comunidade. “Galicia ten unhas posibilidades magníficas para medrar na nova economía verde”, asegurou ao tempo que amosou o compromiso da Administración galega en facilitar o desenvolvemento de proxectos nesta liña.
Tras agradecer o gran labor dos galardoados nesta edición —o concello de Carballo, o colexio Franciscanas de Ourense, Hijos de Rivera, Coca-Cola, a Asociación Nacional de Empresas Distribuidoras de Electrodomésticos (ADEN) e a Iniciativa Social Emprendedora de Reciclaxe Téxtil de Galicia (Insertega)—, Rueda salientou que a Xunta leva anos traballando para consolidar á comunidade coma un referente na loita contra o cambio climático.