Román Rodríguez subliña que a inclusión educativa é unha “prioridade” da Xunta e unha “oportunidade” para acadar unha sociedade máis respectuosa e democrática”
O titular de Educación pon en valor a fortaleza do sistema educativo galego, onde se prima a igualdade, a calidade na atención emocional e o fomento do bo clima na aula
O foro conta coa presenza de Nathalie Berger, directora de Apoio ás reformas dos Estados membros da Comisión Europea, encargada do relatorio inaugural
No decurso do congreso entregáronse os Premios de Boas Prácticas de Inclusión a oito colexios e institutos
O conselleiro de Cultura, Educación, FP e Universidades, Román Rodríguez, salienta o compromiso da Xunta de Galicia co reto da inclusión educativa como “unha das nosas prioridades” así como “unha oportunidade para acadar unha sociedade máis respectuosa e máis democrática”.
Así o expuxo esta mañá con motivo da inauguración do Congreso Internacional de Inclusión Educativa organizado polo seu departamento, que congrega un milleiro de persoas entre docentes e expertos para afondar en accións específicas neste eido. Román Rodríguez deu a benvida e agradeceu a presenza neste foro de Nathalie Berger, directora de Apoio ás reformas dos Estados membros da Comisión Europea, encargada do relatorio inaugural. O congreso tamén serviu de marco para a entrega dos Premios de Inclusión Educativa, uns galardóns anuais nos que se recoñecen as boas prácticas neste eido tanto para colexios como para institutos.
Premios Boas Prácticas inclusivas
O conselleiro aproveitou para felicitar aos oito colexios e institutos que resultaron galardoados na edición deste ano dos Premios de Boas Prácticas Inclusivas, a cuxo alumnado e profesorado agradeceu o traballo e esforzo manifestado e que sirve “de inspiración para continuar avanzando no noso sistema educativo”.
Na categoría B, destinada a ESO, Bacharelato, FP e Formación de persoas adultas e ensinanzas de réxime especial, o primeiro premio foi para o Instituto IES Xograr Afonso Gómez de Sarria, o segundo para o Sanxillao de Lugo, o terceiro para o Instituto de Cacheiras de Teo e a mención de honra para o Instituto de Chapela, en Redondela.