A delegada territorial da Xunta de Galicia en Vigo, Ana Ortiz, inaugurou este luns a segunda edición do obradoiro Coidando o Miñor III que permitirá formar durante o vindeiro ano a 20 persoas desempregadas. Cun investimento de 531.000 euros por parte da Consellería de Promoción de Emprego e Igualdade, reedita unha edición máis un curso que promove Gondomar, xunto con Baiona en Nigrán.

Ademais do obradoiro adicado a Gondomar, a delegada indicou que xa existe unha nova achega de 531.046,20 euros para o curso Vigo Capacita IX, concedidos a través do Concello de Vigo, e outros 265.523,10 euros para o III Obradoiro Forestal Montes de Vigo, a través da Mancomunidade de Montes.

Ademais, Mos promoverá a iniciativa Queda en Mos; Salceda de Caselas contará co curso Reformas e Melloras de Centros Formativos e Cívicos 2023; Salvaterra de Miño terá o Salvaterra Emprega III; Cangas porá en marcha Granxa da Rúa XII; Redondela a cuarta edición do Redondela Máis que Bela IV; O Porriño desenvolverá o obradoiro Porremprego Cualifica II, e Moaña terá o taller Labora VII.

Ortiz, que estivo acompañada polos alcaldes de Gondomar, Francisco Ferreira, e de Nigrán, Juan González, animou aos participantes a aproveitar a oferta formativa e laboral para incrementar as posibilidades de atopar un traballo. “A formación que recibides durante o último ano son unha ventá ao mercado de traballo e tanto a comarca como o resto de Galicia, a sociedade e as empresas, necesitan xente formada, aí é onde tedes a vosa oportunidade”, destacou.