O delegado territorial da Xunta en Pontevedra, Agustín Reguera, inaugurou esta mañá o foro de debate RIAs Baixas: El camino de los algoritmos, que tivo lugar no Pazo Provincial da Deputación de Pontevedra.

Ao acto asistiron decenas de profesionais do sector turístico que durante toda a mañá escoitaron ás ponencias de profesionais especializados en tecnoloxías de Intelixencia Artificial.

O delegado territorial non perdeu a ocasión de agradecer o “espectacular traballo” que está a levar a cabo o sector e que permitiu converter a Galicia “nun referente do turismo nacional, non solo polos seus múltiples atractivos, senón tamén pola calidade dos seus servizos”.

Reguera asegurou que moitos dos éxitos alcanzados ata o momento foron froito da colaboración entre as institucións públicas e as entidades privadas e destacou o saber facer e a honestidade dos profesionais galegos: “Calquera turista sabe que pode ir comer a un restaurante no centro de calquera cidade e que non o van enganar. Sabe que a persoa que o atende no hotel vai velar polos seus intereses e sabe en Galicia vai atopar un tipo de ocio responsable e respectuoso. Temos a sorte de contar cun turismo diversificado, cada vez máis desestacionalizado e sostible”.

O delegado rematou a súa intervención tendendo a man da Xunta a todos os empresarios do sector turístico: “Galicia vai seguir crecendo como un destino moi atractivo nos próximos anos, entre outras cousas polas súas condicións climáticas. Temos que estar preparados e para elo podedes seguir contando coa nosa colaboración. Seguiremos traballando xuntos!”.

Na presentación interviron, ademais do delegado, o presidente do Clúster Turismo de Galicia, Cesáreo Pardal, e o presidente da Deputación de Pontevedra, Luís López. O presidente do Clúster impresionou aos asistentes cun vídeo feito por intelixencia artificial no que se lle podía ver falando en varios idiomas, mentres que López Lugués aproveitou a súa quenda para lembrar a importancia de que a Deputación siga “tecendo pontes” cos profesionais do turismo.

O fin do acto de inauguración deu inicio ás conferencias que impartiron nomes importantes do sector tecnolóxico como Javier Sirvent, que falou da IA xenerativa; Elena Ibañez, Virginia Segui e Thais Gold, que trataron temas como a capacitación e o emprego; e Lázaro Royo, Javier Martín e Juan Antonio Gómez, encargados de tratar temas como a xestión dos datos e a ciberseguridade.