Saint-Malo (Bretaña, Francia), 17 de novembro de 2023

O conselleiro do Mar, Alfonso Villares, desenvolve unha intensa axenda de contactos no marco da celebración da 51ª Asamblea Xeral da Conferencia de Rexións Periféricas Marítimas (CRPM), que cumpre o seu 50 aniversario, e que se está celebrar na localidade francesa de Saint Malo. Neste contexto o titular de Mar realizou unha visita ao obradoiro da rede de integración profesional xestionado pola asociación Pass´Emploi dentro dos proxectos de La Panier de la Mer.

Alfonso Villares coñeceu de primeira man a actividade desenvolvida neste centro no reciben formación 8 persoas en competencias básicas do oficio de fileteador traballando nos diferentes cortes de peixe así como técnicas de procesamento, envasado, embalaxe e o cumprimento das normas sanitarias e limpeza.

Este taller é un dos cinco postos en marcha pola entidade gala dedicada á loita contra o malgasto de alimentos, ao apoio ás persoas en desemprego e a subministrar peixe conxelado a organizacións de axuda alimentaria. Nestes espazos desenvólvense centros de formación marítimas nas que á vez que se forman a novos profesionais, transformase a materia prima procedente do excedente non comercializado nas lonxas redistribuíndo 200 toneladas de peixe ao ano en axuda alimentaria.

Visita a Scea Querrien

O conselleiro tamén realizou unha visita acompañado por un representante do Comité de Acuicultura de Bretaña-Norte -organización que agrupa aos produtores de mexillón, ostra e berberechos desta parte do país galo- á empresa local Scea Querrien dedicada desde 1945 á produción de ostras. Esta compañía, de marcado carácter familiar, conta xa coa cuarta xeración traballando nun dos produtos máis emblemáticos da Bretaña francesa. O responsable autonómico puido coñecer de primeira man as instalacións da firma e os detalles e particularidades do proceso de produción deste molusco nesta parte de Francia.

O responsable de Mar sinala co obxectivo destas visitas é intercambiar experiencias e atopar novas sinerxías entre o sector marítimo pesqueiro galego e bretón que permita poñer en común o coñecemento e bo facer así como valorar posibles liñas de colaboración en diferentes ámbitos de interese para ambas rexións.