Santiago de Compostela, 17 de novembro de 2023

O director xeral de Inclusión Social, Arturo Parrado, participou esta mañá na xornada organizada polo Colexio Oficial de Traballo Social de Galicia baixo o título ‘Modelo Público de Servizos Sociais que defende o Traballo Social’ na Cidade da Cultura. Durante a súa intervención agradeceu a todos os traballadores e traballadoras sociais da nosa Comunidade o seu compromiso na transformación social de Galicia.

O director xeral tamén agradeceu a súa análise dos cambios persoais, familiares e comunitarios que se están a producir na nosa sociedade a través dun informe que se presentou durante estas xornadas. Apuntou que o Goberno galego toma boa nota deste informe para seguir cooperando e traballando nunha maior eficacia e funcionamento do sistema de servizos sociais co obxectivo de mellorar a resposta que reciben as persoas en situación de vulnerabilidade.

Neste sentido, lembrou que a Xunta incrementará o vindeiro ano 2024 a orde de axudas do Plan Concertado para seguir incrementando o número de traballadores sociais na nosa Comunidade. Unha orde de axudas que o vindeiro ano contará cun orzamento de 15 millóns de euros.