O director da casa de Galicia en Madrid, Javier Vásquez, participou na tarde de onte na quinta sesión do ciclo de conferencias, coas grandes achegas dunhas embaixadoras de luxo: Rosa María Quintana e Lydia del Olmo.

A exconselleira do Mar da Xunta de Galicia e doutora en bioloxía, mostrou o poder que ten o mar, destacando a importancia de apostar por el e lembrou que, formando parte da Dieta Atlántica, debe ser fonte de alimentación pola súa gran achega á saúde.

"O consumo de peixes e mariscos, desde nenos, debe ser parte fundamental da dieta. O peixe é saúde. Hai que fomentar o seu consumo, apostar pola súa divulgación e por políticas que axuden a encher o carro da compra", dixo Quintana.

Pola súa banda, Lydia del Olmo, chef Estrela Michelín do Restaurante Ceibe, incidiu na calidade das nosas materias primas, así como na achega que realizan os cociñeiros para mostrar o produto.

"Os cociñeiros temos que ser difusores da boa cociña, do bo produto e de levar unha dieta equilibrada e saudable. A nosa cociña é humilde, sinxela e de calidade, e posible para todos", dixo Lydia del Olmo.