O Diario Oficial de Galicia tamén recolle hoxe a aprobación do expediente de información pública para actuar nun treito de 7 km da vía, desde a parroquia de Seixido ata A Portela da Cruz, no límite coa provincia de Ourense
O DOG recolle a aprobación do proxecto de construción da 3ª fase de acondicionamento da estrada PO-235 no concello da Lama, que suporá un investimento de 3,9 M€
Melloraranse as condicións de circulación e incrementarase a seguridade, ampliando a calzada ata os 7 metros de ancho, ademais de mellorar o trazado en diversas curvas
Tal e como lle trasladou a conselleira de Infraestruturas e Mobilidade ao alcalde da Lama, a previsión é licitar as obras e convocar as expropiacións no 1º semestre de 2024, co obxectivo de iniciar os traballos no vindeiro ano
Esta actuación da Xunta súmase ás xa executadas para o acondicionamento integral da PO-235 ao paso municipio Lama, que supuxeron un investimento de case 3,7 M€
Santiago de Compostela, 8 de novembro de 2023
A Consellería de Infraestruturas e Mobilidade publica hoxe no Diario Oficial de Galicia (DOG) a aprobación do proxecto de construción da terceira fase da mellora da estrada PO-235, no concello da Lama
Mediante esta nova intervención, que suporá un investimento de 3,9 M€, completarase o acondicionamento no treito desta vía autonómica para mellorar as condicións de circulación e incrementar a seguridade viaria ao paso polo municipio pontevedrés.
Tal e como lle trasladou a conselleira de Infraestruturas e Mobilidade, Ethel Vázquez, ao alcalde da Lama, David Carrera, no encontro que mantiveron en San Caetano, a previsión é convocar o levantamento de actas previas das expropiacións e licitar as obras no primeiro semestre de 2024, co obxectivo de iniciar os traballos o vindeiro ano. A actuación ten un prazo de execución de 12 meses.
A publicación hoxe no DOG recolle o acordo aprobado na reunión do Consello da Xunta do pasado 26 de outubro, no que tamén foi aprobado o trámite de información pública deste novo proxecto no concello. A superficie de expropiación acada os 47.905,70 m2.
https://www.xunta.gal/dog/Publicados/2023/20231108/AnuncioG0181-021123-0001_es.html
A través desta nova actuación, a Xunta intervirá nun treito de algo máis de 7 quilómetros, entre o punto quilométrico 18+100 da estrada PO-235, á altura da parroquia de Seixido, e ata o quilómetro 25+000 na Portela da Cruz, xusto no límite coa provincia de Ourense. Este tramo atravesa os núcleos, pertencentes ao concello da Lama, do Campo, A Fentosa e O Eido da Tendeira, ademais de dar acceso a outros núcleos dispersos.
Na actualidade, o trazado deste tramo da PO-235 presenta ao longo do seu percorrido curvas de radio inferior a 25 metros e varios tramos de curvas consecutivas de 1 km de lonxitude, sendo a sección da estrada variable, de anchura máxima de 5,60 metros e con puntos especialmente estreitos, coincidentes con obras de paso da vía autonómica.
A través desta actuación e tratando de adaptarse aos condicionantes existentes, procederase á ampliación da plataforma da calzada ata os 7 metros, distribuídos en 2 carrís de circulación con 3 metros de anchura, respectivamente, e beiravías de 50 centímetros en cada marxe.
Tamén se rectificarán as curvas de menor radio para facilitar a circulación e diminuír o risco de sinistralidade, e renovarase a capa de rodaxe e o firme da estrada.
Na execución dos traballos incluirase unha adaptación da drenaxe transversal da plataforma con tres principais puntos de evacuación. Ademais, realizarase o revestimento de cunetas e renovarase o tendido, a sinalización horizontal e vertical, o balizamento e as defensas de seguridade.
Esta nova intervención da Xunta súmase ás actuacións xa rematadas de acondicionamento integral da estrada PO-235 ao seu paso polo concello da Lama. A Xunta investiu anteriormente case 3,7 millóns de euros na mellora inicial do treito entre a capital municipal e o punto quilométrico 11+870, no lugar de Antas, e realizou a reforma ata o lugar de Seixido, así como unha senda peonil no medio do traxecto.
Imaxes relacionadas
