Vigo, 26 de outubro de 2023

A delegada territorial da Xunta en Vigo e presidenta do Consorcio Casco Vello de Vigo (CCVV), Ana Ortiz, presidiu este xoves o consello de administración do organismo autónomo no que se aprobou o Plan de Actuación, Investimentos e Financiamento (PAIF) do próximo exercicio 2024 tras dous anos bloqueado polos representantes municipais. A representate autonómica destacou a rectificación do posicionamiento do Concello de Vigo que estaba a impedir a rehabilitación de edificios para destinar a vivenda de protección.

“Non houbo ningún tipo de cambio substancial respecto dos anteriores exercicios e a proposta de incluír os remanentes é, nin máis nin menos, a mecánica habitual á hora de elaborar o orzamento, a mesma á que se opuxeron durante os dos últimos anos”, sinalou a delegada territorial

O organismo, cuxo principal obxectivo é a rehabilitación do barrio histórico de Vigo, contará cunha partida total de 1.780.065,00€. Desta cantidade máis do 87% teñen a consideración de investimento directo xa que se destinan á execución das obras de rehabilitación das vivendas propiedade do CCVV, correspondendo o resto a gastos operativo.

Ademais, a cifra de investimento pode incrementarse en 1,3 millóns de euros no caso de que se aprobase a aplicación de fondos de remanentes. O PAIF 2024 contempla, en concreto, investimentos na rehabilitación de seis edificios (Elduayen, 31; Ribeira do Berbés, 39; Subida ao Castelo, 9; Elduayen, 39-Ferrería 16; Hortas, 2-4 -San Sebastián, 20 e Rúa Alta, 8-14) o que permitirá crear un total de 22 novas vivendas na zona.