A Xunta inicia a execución de actuacións de conservación e limpeza nos treitos interurbanos do río Mera no concello de Ortigueira
Os treitos obxecto das intervencións acadan unha lonxitude total de case 5 km
As tarefas céntranse na roza puntual e selectiva e na retirada de árbores e pólas caídas para evitar atoamentos
A entidade hidráulica da Xunta continúa a traballar na mellora dos leitos fluviais para favorecer as condicións naturais do ecosistema dos ríos
Santiago de Compostela, 12 de outubro de 2023
A Consellería de Infraestruturas e Mobilidade, a través de Augas de Galicia, vén de iniciar as actuacións de conservación e limpeza no treito interurbano do río Mera, no concello de Ortigueira.
Estas tarefas desenvolveranse nunha lonxitude de preto de 5 quilómetros, no percorrido deste río por distintos lugares das parroquias de Mera de Abaixo e de Mera de Arriba.
Os traballos céntranse na roza puntual e selectiva e na retirada de árbores e pólas caídas na canle para evitar atoamentos.
Unha vez finalizadas estas actuacións, o río Mera quedará despexado de maleza, posibilitando así a circulación fluída das súas augas.
Augas de Galicia desenvolve estas accións no marco do programa de mantemento, conservación e mellora do dominio público hidráulico das bacías de Galicia-Costa, e nas súas zonas de acceso e protección.
A Xunta mantén activas as actuacións para a mellora dos leitos fluviais e para favorecer as condicións naturais do ecosistema dos ríos.