Santiago de Compostela, 4 de outubro de 2023

A Xunta de Galicia convida a celebrar o irmandamento entre o camino de peregrinación xaponés Kan-Non e o Camiño de Santiago, coa organización de distintas actividades abertas ao público que incluirán un recital de piano e unha exposición fotográfica.

Así, o venres ás 19,00 horas, a Igrexa do Mosteiro de San Martiño Pinario acollerá o recital de piano da compositora Mine Kawakami, que terá como artista convidado ao organista Adrián Regueiro. Durante o concerto realizarase unha homenaxe á tradición e rituais deste camino xaponés e incluirá cantos budistas a cargo de Hendo Okamura. A entrada será libre ata completar a cabida da igrexa.

Tamén desde o venres e ata o 5 de novembro, a Hospedería de San Martiño Pinario acolle a exposición Os Camiños de Kan-Non e Santiago. Espiritualidade e Cultura, tamén organizada pola Xunta de Galicia. Está composta por preto de 40 fotografías que afondan nas similitudes e rituais común entre entre o Camiño Kan-Non, o Kumano Kodo e o Camiño de Santiago.

Xunto a estas actividades gratuítas e abertas ao público, a Xunta de Galicia está a impulsar desde hoxe e ata o venres unha viaxe por distintos lugares do Camiño de Santiago a unha delegación xaponesa que coñecerá así sobre o terreo a ruta xacobea. Trátase dunha visita de cortesía integrada por unha ducia de representantes dos templos, impulsores deste itinerario de peregrinación e integrantes do Consello para a Promoción dos Patrimonios de Xapón, que visitarán O Cebreiro, Lugo, Santiago de Compostela, Fisterra e Muxía.

Estreitos lazos entre Xapón e Galicia

A visita desta delegación dá continuidade á relación establecida entre Xapón e Galicia, que manteñen estreitos lazos a través do Camiño de Santiago, primeiro a través do Kumado Kodo, con quen se asinou o primeiro irmanamento en 1998, e logo co Kan-Non cuxo irmandamento foi o resultado de encontros previos entre o máximo responsable do templo budista Kan-non Sttoj e representantes de Turismo de Galicia.

O Camiño Kan-Non está considerado o itinerario de peregrinación máis antigo de Xapón. Atravesa diversas perfecturas, incluídas Osaka e Kyoto, e percorre un total de 33 templos dedicados á divinidade budista Kan-non.  Os peregrinos que percorren as rutas que unen os templos levan consigo un documento, coñecido como Nokyocho, no que se van colocando 33 selos, un con cada templo.