Vigo, 29 de setembro de 2023

O secretario xeral de Industria, Nicolás Vázquez, avogou hoxe por afrontar os retos e oportunidades da eólica mariña en Galicia desde o diálogo e o consenso e xerando sinerxías na cadea de valor do sector. Segundo explicou, este é un dos obxectivos do convenio que veñen de acordar a Xunta de Galicia e Asime.

No marco dese convenio, celebrouse esta mañá o workshop Desafíos da eólica mariña. Potenciación da cadea de valor. Alí, Vázquez amosouse partidario de promover un debate tranquilo e sosegado no cal poñer en valor as fortalezas de Galicia neste eido                   –a capacidade de xeración renovable, o desenvolvemento industrial e loxístico en eólica offshore ou a competitividade do tecido empresarial- pero, tamén, as liñas vermellas, que están na preservación dos ecosistemas mariños e a defensa dun sector estratéxico como o da pesca.

Segundo dixo, esa é a razón de ser do Observatorio de Eólica Mariña, un punto de encontro de todos os axentes implicados no desenvolvemento deste sector para identificar oportunidades e acordar o camiño a seguir.

O secretario xeral de Industria concluíu agradecendo a Asime o seu papel de interlocutor e a súa colaboración á hora de divulgar as fortalezas da cadea de valor deste sector en Galicia.