O secretario xeral da Emigración, Antonio Rodríguez Miranda, inaugurou esta mañá a mesa redonda de empresas organizada pola Xunta de Galicia e pola fundación Ronsel á que asistiron unha trintena de alumnos da última promoción das Bolsas Excelencia Mocidade Exterior que decidiron optar por Galicia para poñer en marcha a súa vida persoal e profesional.

Nesta mesa redonda participaron empresas que trasladaron técnicas e ferramentas aos asistentes tanto para a busca de emprego por conta allea especialmente nos eidos tecnolóxicos, culturais e de desenvolvemento dixital. Tamén asistiron firmas dedicadas á captación de traballadores, que explicaron a estes galegos do exterior como facer a busca de emprego máis efectiva.

O secretario xeral agradeceu na súa intervención a aposta que os alumnos BEME están a facer por formar parte da sociedade galega, e recordoulles que dende a Xunta de Galicia ofrécense apoios e iniciativas en tódolos ámbitos para facilitar a súa inserción co maior éxito posible, grazas a Estratexia Galicia Retorna que inclúe tamén programas enfocados no eido laboral, como é o Retorna Cualifica Emprego, que facilita encontrar un traballo a galegos do exterior e que vai acompañado dun plan personalizado de cualificación e empregabilidade así como de recursos de formación e a formalización do correspondente contrato de traballo. 

Miranda tamén insistiu na importancia, neste senso, que ten para tódolos galegos retornados a Oficina Integral de Asesoramento e Seguimento ao Retorno, situada en todas as cidades galegas, “xa que son un importante recurso de apoio en tódolos ámbitos para aqueles que volven a Galicia”.