O director da Axencia Galega da Calidade Alimentaria, José Luis Cabarcos, participou esta mañá en Monforte de Lemos na conmemoración do Día Europeo da Agricultura Ecolóxica -que se celebra mañá sábado-, un acto organizado polo consello regulador da Agricultura Ecolóxica de Galicia (Craega).

Na xornada, José Luis Cabarcos puxo en valor a importancia deste sector na nosa comunidade e lembrou o constante incremento rexistrado na última década tanto en superficie certificada (medrou case un 200 %) como en operadores rexistrados (cun incremento do 148 %) e en facturación (tivo unha suba do 385 %). Así, en Galicia a superficie certificada en ecolóxico chega actualmente ás 45.600 hectáreas, a cifra de operadores ecolóxicos supera os 1.500 e o valor económico estimado rolda os 113 millóns de euros, segundo datos de 2022.

Ademais, o director subliñou que o leite e os seus derivados constitúen, en Galicia, os produtos máis destacados neste ámbito produtivo, seguidos da carne e derivados; as conservas de peixe; outros elaborados e os ovos e derivados. O ranking dos dez primeiros produtos amparados polo Craega complétase cos produtos da acuicultura; os pensos e alimentación animal; os viños licores, sidras e vinagres; as froitas e os aceites.

A este evento asistiron arredor de 430 escolares dos colexios de Monforte de Lemos, que puideron degustar produtos ecolóxicos certificados de Galicia. A maiores, presentouse o libro infantil “Os Bolechas e os alimentos ecolóxicos”, que xa foi distribuído en todas as escolas e bibliotecas da comunidade, e houbo unha actuación dirixida aos máis cativos a cargo do músico e compositor Pakolas.