O director de Turismo de Galicia, Xosé Merelles, valorou hoxe moi positivamente o traballo que están realizando os profesionais do turismo no destino Terras de Compostela ao ser quen de incorporar 17 entidades co distintivo SICTED e contribuír así, indicou, “a reforzar a imaxe de Galicia como destino cada vez máis competitivo”.

Durante o acto de entrega deste recoñecemento, o director de Turismo puxo de manifesto a “importancia estratéxica” de que a Comunidade galega conte cada vez con máis calidade turística certificada “algo fundamental para mellorar a imaxe do sector, diferenciar o noso destino fronte a outros e tamén consolidar a fidelidade dos visitantes que recibimos cada ano”.

De feito, como cuantificou, as cifras aumentan cada ano e a día de hoxe Galicia conta cun total de 19 destinos SICTED con 1.343 entidades que xa teñen a súa distinción ou están adheridas e implementando as correspondentes boas prácticas para acadala. “Gracias a destinos como Terras de Compostela, Galicia avanza en calidade e competitividade xa que cada vez estamos a ter máis peso en distintivos que a certifican como os SICTED”, indicou. Referiuse, en concreto, á posición destacada en comparación cos destinos cos que máis se asemella, os da España Verde, onde a comunidade galega lidera o número de empresas con este distintivo.

45 empresas na área de Compostela

Xosé Merelles felicitou ao destino Terras de Compostela -do que forman parte os concellos da Baña, Ames, Boqueixón, Brión, Negreira, Santa Comba, Teo, Val do Dubra e Vedra- porque “desde a súa creación como destino SICTED no ano 2019 vén amosando que os profesionais que forman parte del traballan sen descanso pola excelencia e certificar a súa calidade”. De feito, a día de hoxe conta cun total de 45 entidades e empresas adheridas e 30 xa distinguidas con este distintivo.