Soutomaior (Pontevedra), 14 de setembro de 2023

A delegada territorial da Xunta de Galicia en Vigo, Ana Ortiz, reclamou este martes ao Concello de Soutomaior que desbloquee a cesión da parcela para construír o novo Centro de Saúde. Así o fixo durante a xuntanza que mantivo hoxe co alcalde, Manuel Lorenzo, no marco da rolda de contactos que a representante autonómica leva a cabo con todos os rexedores da área territorial. 

Xunta e Concello xa firmaron o pasado mes de outubro de 2022 o convenio de colaboración que regulará a construción dun novo centro de saúde que triplicará a superficie do actual e o Goberno galego segue á espera do visto bó municipal para contar coa parcela. A nova infraestrutura será un inmoble moderno, fronte as instalacións de máis de 31 anos que se están utilizando neste momento; e que a superficie do futuro centro – un total de 1.500m2-, supón triplicar a superficie do actual en Arcade – que ascende a 480 m2-.

Ana Ortiz xa mantivo anteriormente encontros cos máximos responsables municipais de Baiona, Cangas, Moaña, Mos, O Porriño, Salvaterra de Miño, Nigrán, Vigo e Redondela despois de dirixirse por carta a todos os alcaldes da área territorial para poñer en común as súas axendas e fixar o antes posible unha xuntanza de traballo.