O delegado territorial da Xunta en Ourense, Gabriel Alén, supervisou esta mañá as obras de mellora da eficiencia e accesibilidade do local da Asociación Veciñal Quince de Agosto de Reza, no concello de Ourense, nas que a Vicepresidencia Primeira e Consellería de Presidencia, Xustiza e Deportes está a investir 12.000 euros ao abeiro do Plan específico de acción comunitaria.

O delegado territorial detallou que na convocatoria de 2023 foron beneficiarias desta orde de axudas 58 entidades da provincia de Ourense cun importe de 599.397,54 euros. Desta contía, 506.154,43 euros destináronse a 48 asociacións de veciños, 51.944,22 euros a cinco comunidades de usuarios de augas, e 41.298,89 euros a 5 colectivos de mulleres rurais. No conxunto de Galicia e desde a posta en marcha da medida, o investimento do Goberno galego supera os 18,8 millóns de euros cos que se apoiaron máis de 1.649 proxectos.

Destacou Gabriel Alén ao asociacionismo local como principal canle para detectar e atender as necesidades veciñais e subliñou o importante traballo que desenvolven estas entidades en estreito contacto coa poboación da súa contorna polo que se fai necesario o máximo apoio das administracións, con medidas específicas como é facilitarlles espazos axeitados para o desenvolvemento da súa actividade.

Por iso, quixo lembrar o delegado territorial importancia deste tipo de axudas destinadas a asociacións veciñais, confederacións, federacións ou unións de asociacións de veciños, comunidades de usuarios de augas e asociacións de mulleres rurais de Galicia, que teñen como finalidade o acondicionamento, reforma e ampliación dos locais sociais e a compra de equipamentos básicos para o seu funcionamento, como mobiliario, equipos informáticos e audiovisuais ou material non básico específico para levar a cabo determinadas actividades. Ademais, poden contemplar proxectos de mellora, reforma e reparación das instalacións das traídas de auga promovidas por comunidades de usuarios de augas para garantir o abastecemento.

As obras

As obras consisten no acondicionamento da sala diáfana; a demolición de tabique cerámico de ladrillo oco dobre, realizado mediante medios manuais. Estase a traballar na demolición dos armarios empotrados das estancias e na retirada de dúas unidades interiores e unha exterior de aire acondicionado de parede.

Tamén principiaron as obras de reparación do falso teito de xeso e as de adaptación da instalación eléctrica coa reforma dos circuítos eléctricos de alumeado.

A continuación instalarase tarima flotante vinílica imitación a madeira, incluíndo lámina illante acústico e rodapé, dintel reforzado e tabique de axuste.