A Xunta inviste máis de 1,5 M€ no Salnés en axudas para mellorar as infraestruturas dos establecementos turísticos de aloxamento
O delegado territorial visitou o Hotel Puente de la Toja, que recibiu máis de 33.700 euros para mellorar as súas instalacións
O total do investido na comarca do Salnés supera os 1.1 millóns de euros
A Xunta, a través da Axencia Turismo de Galicia, investiu máis de 1.1 millóns de euros en axudas para a mellora das infraestruturas dos establecementos turísticos de aloxamento no Salnés. Estas axudas, das que se beneficiaron máis de 100 establecementos en toda Galicia, pretenden potenciar este importante sector na Comunidade Autónoma.
Neste sentido, o delegado territorial da Xunta en Pontevedra, Agustín Reguera, visitou esta mañá o Hotel Puente de la Toja de O Grove, un dos establecementos turísticos de aloxamento que se beneficiaron destas axudas.
O Hotel Puente de la Toja recibiu máis de 33.700 euros para mellorar as súas instalacións. En concreto, o aporte da Xunta permitirá cofinanciar as obras de illamento das fachadas coas que este edificio de preto de 45 anos pretende mellorar a súa eficiencia enerxética.
Reguera puido percorrer, acompañado polo propietario do hotel, Javier Devesa, as instalacións do complexo que durante este verán rexistrou unhas moi boas cifras de ocupación. O delegado destacou que os bos resultados son a consecuencia da excelencia dos empresarios galegos e do bo traballo que está a facer a Xunta dende hai moitos anos e que “conseguiu posicionar a Galicia como un destino de referencia tanto a nivel nacional como internacional”.
Canto ás axudas concedidas, o delegado territorial lembrou que o obxectivo da Xunta “é impulsar o turismo en toda a comunidade Autónoma, mediante axudas directas que permiten aos empresarios do sector mellorar uns servizos que, cada vez máis, destacan pola súa calidade”.
Imaxes relacionadas
