O Porriño (Pontevedra), 30 de agosto de 2023 A conselleira de Infraestruturas e Mobilidade, Ethel Vázquez, avanzou esta mañá que a Xunta rematará a finais deste ano a humanización das rúas Buenos Aires e Progreso do Porriño logo dun investimento de case 1 M€. 

Vázquez Mourelle, xunto co alcalde do Porriño, Alejandro Lorenzo, e a concelleira de Urbanismo, Antía Carrera, supervisou hoxe o avance destas obras para transformar a imaxe e a configuración destas rúas e facelas máis seguras, máis accesibles e máis humanas. 

Trátase dunha reforma integral na vía autonómica PO-329 ao seu paso polo centro urbano, destinada a transformar unha estrada en rúa e conseguir que os coches cedan protagonismo en favor dos peóns. 

A actuación desenvólvese nun treito de case 700 metros da PO-329 para reforzar a seguridade a pé dos veciños, ademais de mellorar a accesibilidade e o aspecto estético da vía, favorecendo a súa mellor integración na vida urbana do núcleo do Porriño. 

As obras completan a renovación desta estrada, continuando a intervención executada no treito inicial no termo municipal de Mos. 

Os traballos teñen como obxectivos facer as beirarrúas máis anchas, para favorecer un tránsito máis cómodo e seguro para os veciños; primar os peóns fronte aos vehículos, reducindo para iso a anchura dos carrís de circulación; e reordenar as zonas de aparcadoiro. 

Tamén se prevé a renovación dos pavimentos e a dotación de mobiliario urbano e mellora da iluminación con 22 novos puntos de luz e con reforzos lumínicos nos pasos peonís, para garantir unha maior seguridade. 

O proxecto, a petición do Concello e o Consorcio de Augas do Louro, estase a aproveitar para acometer tamén unha necesaria renovación e ampliación das redes de saneamento e abastecemento. 

Ámbitos de actuación

A intervención, segundo as necesidades detectadas, dividiuse en diferentes ámbitos, comezando pola zona da rúa Buenos Aires, no treito final da actuación.

Na zona máis próxima ao río, a prioridade era mellorar a seguridade peonil, colocando pasos elevados e adaptándonos á normativa de accesibilidade. 

Nas proximidades da glorieta, acométese unha actuación máis ampla, coa reordenación da calzada para gañar espazo para os peóns, reducindo o dos carrís, ademais de dispoñer sitio para os contedores e aparcadoiros, renovando e ampliando tamén as beirarrúas, a iluminación e a sinalización e dispoñendo mobiliario urbano.

Sinalou que finalmente se intervirá no treito máis complexo, entre o paso a nivel e o acceso á empresa Frigolouro, onde os técnicos se comprometen a actuar coa maior axilidade e coidado para minorar a afección e as molestias. 

Puxo en valor esta actuación transformadora da accesibilidade, da seguridade peonil e da estética da estrada PO-329 no Porriño.