A Xunta promove en Frankfurt durante esta fin de semana a oferta turística galega no marco da Feira Museumsuferfest
Turismo de Galicia participa nesta feira dende o 2012 cun stand de información turística e actuacións musicais de Sheila Patricia, Susana Seivane e Broken Peach
Nos primeiros sete meses do ano chegaron a Galicia máis de 81.000 mil turistas procedentes de Alemaña
A Xunta participa naMuseumsuferfest, a festa da beira dos Museos, que ten lugar esta fin de semana en Frankfurt para promover a oferta turística galega. A participación galega consiste nun stand de información turística con dous informadores galegos e actuacións musicais de Sheila Patricia, Susana Seivane e Broken Peach, estos últimos contratados pola OET de Frankfurt.
O Museumsuferfest é a celebración festiva máis importante da cidade, un dos festivais culturais máis relevante de Alemaña e a festa “de rúa” que convoca maior número de visitantes do país, conxuntamente coa Festa da Cervexa de Múnic. A afluencia media dos últimos anos foi de 2.500.000 visitantes con preto dun millón de visitantes por día.
España é o único país que conta con recinto propio composto por unha zona de carpas turísticas informativas, o restaurante do antigo Centro Galego en Frankfurt e un escenario con programación cultural e música en directo. Turismo de Galicia leva participando neste evento dende o primeiro ano da participación de España, no ano 2012.
Durante os días que dura a celebración, os visitantes poden gozar das actuacións musicais nos numerosos escenarios ao longo da beira do río Main, dos postos de venda de comida de moitos recunchos diferentes do planeta e, visitar os máis de 20 museos que dan nome ao evento e que ofrecen exposicións, actividades, horarios e prezos especiais para o Museumsuferfest.
Mercado alemán
Nos primeiros sete meses do ano chegaron a Galicia máis de 81.000 mil turistas procedentes de Alemaña con 130.000 pernoctacións nos establecementos hoteleros galegos, cifras que superan en preto dun 10% os datos do pasado ano.
Tamén cabe destacar a importancia do turismo alemán, que supón o cuarto mercado internacional na chegada de peregrinos.
Imaxes relacionadas
