A Xunta de Galicia e a Comisión Fulbright veñen de seleccionar aos novos bolseiros que se trasladarán a Estados Unidos para completar os seus estudos vinculados ao eido cultural ao abeiro do programa de Bolsas Fulbright convocado entre as dúas organizacións. Trátase dunha iniciativa na que Galicia é pioneira, xa que é a única comunidade autónoma que dispón este tipo de bolsas culturais.

Os cinco profesionais asistiron a unha xornada de orientación en Madrid na que tamén estivo o secretario xeral técnico da Consellería de Cultura, Educación, FP e Universidades, Manuel Vila, que lles felicitou pola súa traxectoria. Trátase de Mateo Balboa Doldán, que desenvolverá a súa estadía na Manhattan School of Music de Nova York tras cursar os seus estudos no Conservatorio Superior de Música da Coruña e na Universidade de Bergen; Noa Covelo, que estudou Arte Dramática na Escola Superior de Arte Dramática de Galicia que estará no Bartenieff Institute of Movement Studies, e Viveka Goyanes de Miguel, licenciada en Belas Artes pola Universidades de Vigo que realizará a súa estadía no Pratt Institute da Nova York.

Asemade, Ventura Alejandro Pérez Suárez, doutor en Belas Artes pola Universidade de Vigo, desprazarase á School of Visual Arts e Pedro González Fernández, que irá a Stanford University en California tras cursar estudos no Conservatorio Profesional de Música de Vigo e na Escola Superior de Música de Cataluña.

Iniciativa pioneira

Os seleccionados para participar nesta iniciativa están vinculados, todos eles, con Galicia por nacemento, residencia, formación en estudos superiores ou artísticos e traxectoria profesional. Realizarán estadías de formación académica, de investigación artística ou de desenvolvemento de proxectos cun sólido compoñente investigador nas áreas de artes audiovisuais, escénicas, plásticas e visuais, música e musicoloxía, museoloxía e conservación do patrimonio e á xestión cultural.

O acordo entre a Comisión Fulbright e o Goberno galego para promocionar e divulgar o patrimonio e a cultura de Galicia a través de estadías, que terán unha duración de entre seis e 12 meses, é unha iniciativa pioneira no noso país.

As bolsas están destinadas a gastos de viaxe, manutención, gastos de proxecto, de matrícula e taxas obrigatorias que poidan existir, así como gastos de xestión. Pola súa banda, a achega da Comisión Fulbright cobre os gastos de cobertura médica e de accidentes das bolseiras durante a súa estancia no estranxeiro, entre outros.