Santiago de Compostela, 21 de xullo de 2023 A Oficina Técnica da Seca da Xunta activou hoxe a declaración de prealerta por escaseza de auga moderada no sistema de abastecemento do río Mero, Arteixo e ría da Coruña; na bacía do río Anllóns e costa da Coruña ata o límite de Arteixo; e no subsistema de Baiona.

A directora de Augas de Galicia, Teresa Gutiérrez, presidiu hoxe a primeira xuntanza do verán da Oficina Técnica da Seca, na que participan, xunto aos técnicos de Augas de Galicia, representantes de Protección Civil, de Meteogalicia e da Consellería do Medio Rural.

A Oficina Técnica da Seca confirmou que a situación do resto dos sistemas de abastecemento da Demarcación Hidográfica Galicia-Costa, de competencia da Xunta, presenta niveis de normalidade.

A ocupación actual nos encoros de abastecemento de Galicia-Costa, a data 17 de xullo, é do 86%. A directora de Augas de Galicia animou a manter de xeito xeral as medidas de uso responsable da auga para preservar e garantir este recurso natural.

Teresa Gutiérrez explicou que a situación actual na Demarcación Galicia-Costa non se corresponde cun estado de seca, se ben algúns sistemas empezan a mostrar certas debilidades que fan preciso esta declaración de prelaerta por escaseza.

En concreto a declaración de prealerta no sistema de explotación do encoro de Cecebre, na bacía do río Mero, Arteixo e ría da Coruña, prodúcese por atoparse a ocupación por debaixo da media dos  últimos anos, situándose na actualidade a un 69%.  Augas de Galicia traballará co xestor dese sistema de abastecemento para facer seguimento da situación. A directora de Augas de Galicia explicou que existe a posibilidade alternativa de utilizar as reservas de auga do lago de Meirama no  caso de ser necesario, o que significa que o abastecemento está garantido.

No caso do sistema de explotación do río Anllóns, a declaración de prealerta por escaseza obedece á baixada dos niveis de caudal fluínte.

A directora de Augas de Galicia, indicou que a Oficina técnica da Seca tamén a declaración de prealerta de escaseza para activar as medidas equivalentes no subsistema de Baiona polo actual volume encorado (77%),  tendo en conta que é un encoro de pequeno tamaño e á vista da situación meteorolóxica e do aumento da poboación estival na zona.

Comunicación aos concellos

A situación de prealerta por escaseza implica a realización dun seguimento intensivo da situación meteorolóxica e os niveles de ríos, encoros e acuíferos da demarcación Galicia-Costa, así como das posibles incidencias que se detecten. Ademais prevense medidas de concienciación da cidadanía.

Augas de Galicia intensificará o labor de control do estado dos sistemas de abastecemento, pasando dun seguimento mensual a unha análise cada 15 días e avaliando un abano máis amplo de indicadores.

Ademais, segundo estable o Plan de Seca da Demarcación Galicia-Costa, Augas de Galicia informará desta declaración por escrito aos alcaldes dos municipios dos sistemas de abastecemento da Demarcación nos que hoxe se activou o estado de prealerta por escaseza.

Na comunicación aos concellos Augas de Galicia traslada medidas estratéxicas que se propoñen adoptar neste estado de prealerta, nas que se inclúen o incremento da frecuencia do control e vixilancia dos indicadores e o intercambio e actualización da información.

Tamén se incide nas medidas de concienciación cidadá acerca da escaseza de auga e da necesidade de aforro, a través de campañas e bandos municipais; así como no control do usos e detraccións do recurso desde o organismo de conca e o control dos usos a nivel dos concellos ou sistemas de abastecemento.

Dentro do espírito de colaboración, desde a Xunta solicítase a implicación dos concellos para establecer as medidas que consideren apropiadas, dentro do seu ámbito de competencia, e levar a cabo unha labor de concienciación cidadá e un control axeitado dos usos da auga que se realicen no seu municipio.