O conselleiro do Mar embarcou nun barco mexilloeiro no porto de Combarro e visitou un polígono de bateas
Galicia compensa ata o 50% das caídas de ingresos rexistradas polos acuicultores en 2022 ante peches prolongados da actividade pola presenza de toxinas
O titular de Mar destaca que a Xunta destina 500.000 euros a estes apoios para paliar o impacto nos resultados das empresas da prohibición de recoller os moluscos cultivados de xeito ininterrompido durante máis de catro meses consecutivos
As achegas buscan dar resposta á situación excepcional vivida o ano pasado en determinadas zonas nas que se detectou de xeito recorrente a presenza de toxinas paralizantes, lipofílicas ou as dúas á vez
Un informe do Instituto Tecnolóxico para o Control do Medio Mariño de Galicia (Intecmar) constata que hai medio cento de potenciais beneficiarios, os titulares de establecementos de acuicultura en dous polígonos de bateas de Bueu e tres de Portonovo, nos que houbo esa maior virulencia dos episodios tóxicos
Alfonso Villares salienta que a contía das axudas se establecerá comparando a facturación de 2022 coa dos tres exercicios anteriores, tal como recolle a orde que publicará o Diario Oficial de Galicia nos vindeiros días
O conselleiro do Mar, Alfonso Villares, embarcou hoxe nun barco mexilloeiro no porto de Combarro e visitou un polígono de bateas, onde destacou que a Xunta vai publicar nos vindeiros días unha orde de axudas no ámbito da acuicultura para compensar ata o 50% do descenso nos ingresos rexistrados en 2022 polos produtores de moluscos como consecuencia dos episodios recorrentes de toxinas mariñas nas rías galegas, o que lles impediu sacar o produto ao mercado.
Estas achegas, explicou o titular de Mar, contan cun orzamento de 500.000 euros e están destinadas a titulares de establecementos de acuicultura que visen suspendida a recollida dos moluscos cultivados de xeito ininterrompido durante máis de catro meses consecutivos no pasado exercicio.
O representante do Executivo galego incidiu en que os apoios pretenden dar resposta á situación excepcional vivida en 2022, no que se detectou unha especial virulencia dos episodios tóxicos ao rexistrarse de xeito recorrente en distintos puntos do litoral de Galicia toxinas paralizantes, lipofílicas ou incluso as dúas á vez.
As achegas -cofinanciadas co Fondo Europeo Marítimo e de Pesca (FEMP)- cubrirán como máximo a metade do descenso nos ingresos rexistrados polos produtores de acuicultura, ata un máximo de 100.000 euros, e o seu importe calcularase comparando a facturación da empresa no exercicio 2022 coa obtida nos tres exercicios anteriores (2019, 2020 e 2021).
Alfonso Villares detallou que os potenciais beneficiarios destas axudas son algo máis de medio cento de titulares de máis de 80 establecementos de acuicultura que superaron o ano pasado eses catro meses continuados de peches para a extracción de moluscos como consecuencia da presenza de toxinas. De feito, segundo un informe do Instituto Tecnolóxico para o Control do Medio Mariño de Galicia (Intecmar), os polígonos de bateas que tiveron un número de días de prohibición da actividade superior a catro meses pola presenza de toxinas son cinco: os A e B de Bueu e os A, B e C de Portonovo.
A orde coa convocatoria destes apoios sairá publicada no Diario Oficial de Galicia nos vindeiros días para que os posibles beneficiarios consulten os requisitos e a documentación necesaria para acceder a eles. O prazo de presentación de solicitudes será dun mes desde a publicación no DOG co obxectivo de que os produtores poidan paliar o impacto que os peches continuados pola presenza de toxinas mariñas no litoral tivo no desenvolvemento normal da súa actividade.
Imaxes relacionadas
