A Xunta comeza as obras de mellora do firme na estrada autonómica LU-121 entre Abadín e Cospeito
Os traballos, que se inician nesta vía autonómica, desenvolverase desde o quilómetro 0 ao 3+700, no seu percorrido polos municipios de Vilalba, Cospeito e Abadín
A actuación forma parte do contrato de reforzo da capa de rodaxe en 4 estradas da Xunta nas comarcas de Lugo e da Terra Chá, cun investimento de máis de 3,4 M€
Rehabilitarase o firme en distintos treitos das estradas LU-111, LU-121, LU-120 e LU-113 nos municipios de Rábade, Abadín, Vilalba, Begonte, Castro de Rei, Cospeito e A Pastoriza
As intervencións, cun prazo de execución de 6 meses, consisten na rehabilitación do firme mediante o fresado e a reposición da capa de rodaxe, ademais do repintado das marcas viarias
A Consellería de Infraestruturas e Mobilidade vén de comezar as obras de mellora do firme na estrada autonómica LU-121, no treito que comunica os municipios de Abadín e de Cospeito.
Esta actuación forma parte do contrato de acondicionamento da capa de rodaxe previsto en 4 estradas de titularidade da Xunta ao seu paso polas comarcas de Lugo e da Terra Chá, cun investimento de máis de 3,4 M€.
O obxectivo é rehabilitar o firme en varios treitos das estradas LU-111, LU-121, LU-120 e LU-113, nos municipios de Rábade, Abadín, Vilalba, Begonte, Castro de Rei, Cospeito e A Pastoriza.
Os traballos comezaron pola estrada LU-121, onde se actuará no tramo de máis de 3,7 quilómetros entre o punto 0 ao 3+700, nos concellos de Vilalba, Cospeito e Abadín.
As intervencións obxecto deste contrato inclúen ademais a rehabilitación do firme na LU-111, do punto quilométrico 0 ao 12+910 e do 13+980 ao 18+420, nos concellos de Rábade, Begonte, Cospeito e Vilalba.
Tamén se intervirá na LU-120 para a mellora do o firme desde o quilómetro 0+000 ao 30+390, que discorre polos municipios de Vilalba, Cospeito, Abadín, Castro de Rei e A Pastoriza.
Estas actuación completarase cos mesmos traballos na LU-113, desde o punto quilométrico 0+000 ao 6+000, nos concellos de Castro de Rei, Cospeito e Abadín.
As intervencións, cun prazo de execución de 6 meses, consisten na rehabilitación superficial do firme mediante o fresado e a reposición da capa de rodaxe, completado co repintado das marcas viarias.
Tamén se inclúen nestas obras outras actuacións adicionais, como a limpeza e reperfilado de marxes e a execución de gabias de seguridade de formigón.
Imaxes relacionadas
