O secretario xeral da Emigración, Antonio Rodríguez Miranda, fixo entrega esta mañá dos diplomas aos alumnos que participaron no programa Escolas Abertas que permitiu a formación en diferentes eidos musicais, gastronómicos e artesanais de medio centenar de galegos do exterior, membros das entidades galegas de Europa e América. No acto estivo acompañado pola directora da Escola Superior de Hostalería de Galicia, Marta Fernández Vázquez, e a subdirectora de Coordinación Administrativa e Programas Sociais da Secretaría Xeral da Emigración, Isabel Martínez Pellicer.

Rodríguez Miranda felicitou a tódolos participantes por estas dúas semanas intensas de formación e destacou a importancia das entidades do exterior das que proceden na transmisión da cultura galega. “Todo o que aprendestes estes días con estes fantásticos mestres e a través das máster class de recoñecidos músicos, artesáns, bailaríns e cociñeiros será agora trasladado ás novas xeracións a través das clases que os centros galegos ofrecen para a nosa colectividade en todos os vosos países”, explicou o secretario xeral da Emigración.

Este programa, que leva desenvolvéndose varias décadas, está dirixido ás entidades galegas do exterior, e permite dar formación especializada ás persoas responsables de impartir docencia en actividades de cultura tradicional galega, de confección de traxes tradicionais galegos e de cociña galega.

Trátase de cursos presenciais que pretenden garantir a participación da cidadanía galega no exterior, tanto na vida social como na vida cultural de Galicia, de cara a dinamizar as comunidades galegas de Europa e América.

Entre os participantes atópanse galegos chegados dos centros de Cuba, Arxentina, Uruguai, México, Chile, Costa Rica, Estados Unidos, Venezuela e Brasil, así como de diversos centros de toda España.

Os alumnos pecharán estas dúas semanas de formación o próximo sábado, día 15, cunha gala de presentación na praza do Marqués de Amboage de Ferrol, ás 19.30 horas. Os participantes ofrecerán á cidadanía de Ferrol e aos membros das asociacións culturais da localidade diversas actuacións musicais e de danza, así como tamén un desfile cos traxes tradicionais que confeccionaron estes días. A gala rematará co espectáculo de gaitas e luz Mitic.