A Xunta vén de publicar unha guía informativa sobre os pasos necesarios para inscribir unha asociación no Rexistro de Asociacións da Comunidade. A solicitude de inscrición neste rexistro é un dos cinco bloques deste documento, que xa está dispoñible no apartado de asociacións da Xunta e tamén na sede electrónica (https://sede.xunta.gal/). Os outros catro puntos fan referencia ao réxime xurídico das asociacións, publicidade do Rexistro mediante a obtención de copias e certificados, taxas, declaración de utilidade pública das asociacións e contacto.

A guía pretende simplificar a tramitación para realizar as inscricións, incluíndo as dúbidas máis habituais das entidades asociativas. Deste xeito, buscase reducir o número de consultas e requirimentos que afectan á axilidade na resolución de determinados procedementos. Por iso, o documento tamén poderá descargarse no enlace que se incluirá nos requirimentos e na contestación dos correos electrónicos de consulta.

Cómpre lembrar que poden darse de alta no Rexistro de Asociacións da Comunidade, asociacións, federacións, confederacións e unións de asociacións con ámbito de actuación comprendido dentro da comunidade. Trátase de entidades que desenvolven principalmente as súas actividades neste ámbito territorial, e sempre que non teñan fin de lucro nin estean sometidas a un réxime asociativo específico. Actualmente neste rexistro xa figuran 40.000 asociacións e estase a producir un aumento nestes trámites debido ao incremento do terceiro sector, en especial do movemento asociativo.

Non se poden inscribir neste rexistro os partidos políticos, sindicatos e organizacións empresariais, igrexas, confesións e comunidades relixiosas, federacións deportivas, asociacións de consumidores e usuarios e calquera outras reguladas por leis especiais.

As asociacións que soliciten a súa inscrición nos rexistros da comunidade, deberán establecer nos seus estatutos un domicilio en Galicia determinado polo ámbito territorial de actuación. A inscrición formalízase no Rexistro central ou provincial, en función do ámbito territorial que conste nos estatutos da asociación.