A Xunta propón converter a 144 profesionais dos servizos sociais en traballadores a tempo completo e unha nova retribución para domingos e festivos
O Goberno galego trasladou hoxe ás organizacións sindicais unha proposta de acordo sobre as condicións especiais de traballo do ámbito social
A Xunta de Galicia proporá converter en traballadores a tempo completo a 144 profesionais do ámbito dos servizos sociais que ata agora estaban traballando a tempo parcial.
Así se recolle na proposta de acordo sobre as condicións especiais de traballo do persoal dos centros de xestión propia da Consellería de Política Social e Xuventude que foi trasladada hoxe ás organizacións sindicais para a súa negociación.
Este acordo tamén inclúe unha dobre compensación para os profesionais que traballen en domingos e festivos: proponse implantar unha retribución económica nova para remunerar estas xornadas e un descanso adicional polo traballo neses días.
Así, os postos con xornada inferior á ordinaria anual converteranse en postos de xornada completa anual, e ademais, en canto ao traballo en domingos e festivos, establécese unha compensación económica por cada grupo de catro domingos e/ou festivos traballados e dous días adicionais de descanso.
Por outra banda, aqueles traballadores que por necesidade do servizo teñan que traballar os días 24 e 31 de decembro serán compensados cunha retribución específica similar á de día festivo.
Ademais, o documento recolle medidas de conciliación para os traballadores dos servizos sociais que traballan a quendas e que benefician ao seu descanso semanal.