Preto de 18.000 aspirantes están chamados a participar nas oposicións que se celebrarán esta fin de semana no recinto da Feira Internacional de Silleda para acceder a 238 prazas de emprego público na Xunta.

As probas comezarán mañá sábado, ás 9,00h para cubrir 54 prazas de auxiliar de clínica ás que están convocadas 1.841 persoas; e a partir das 16,00h será a quenda dos 3.399 aspirantes convocados para 65 pazas de auxiliar coidador.

A continuación, o domingo 9 de xullo, ás 10,00h, realizarase a oposición para a agrupación profesional de persoal subalterno, no que están chamadas a participar 12.444 persoas para 119 prazas.

Operativo de seguridade

Un operativo formado por 280 persoas controlará que todos os procesos selectivos se desenvolvan de xeito correcto e con total seguridade. O recinto feiral de Silleda disporá tamén dunha ambulancia, habilitada pola Administración galega para atender calquera incidencia que se puidese producir durante a realización das probas.