Os participantes no programa Escolas Abertas da Secretaría Xeral da Emigración inician a súa formación no Centro Superior de Hostalería de Galicia
Esta mañá tivo lugar a inauguración deste programa que ten como obxectivo dar formación especializada ás persoas responsables de impartir docencia en actividades de cultura tradicional galega, confección de traxes tradicionais e cociña nos centros galegos do exterior
Durante unha semana, os participantes recibirán tamén a visita de recoñecidos músicos e cociñeiros, iniciando esta tarde a primeira master class o músico Abraham Cupeiro
Santiago de Compostela, 06 de xullo de 2023
O medio cento de galegos do exterior que participa no programa Escolas Abertas da Secretaría Xeral da Emigración iniciaron hoxe a súa formación en baile tradicional galego, canto popular e pandeireta, gaita tradicional galega, percusión tradicional galega, confección de traxe tradicional galego e cociña no Centro Superior de Hostalería de Galicia.
A subdirectora xeral de Relacións coas Comunidades Galegas, Isabel Martínez Pellicer, inaugurou estes obradoiros que se prolongarán ata o próximo sábado día 15 e que se volveron a recuperar en 2023 tras tres anos de suspensión por mor da pandemia.
Os máis de 50 participantes nesta iniciativa son membros das entidades galegas de dez países de Europa e América, e deste xeito, recibirán formación especializada para impartir docencia en actividades de cultura tradicional galega, de confección de traxes tradicionais galegos e de cociña galega.
Trátase de cursos presenciais que pretenden garantir a participación da cidadanía galega no exterior, tanto na vida social como na vida cultural de Galicia, de cara a dinamizar as comunidades galegas de Europa e América.
Durante unha semana, os participantes recibirán tamén a visita de recoñecidos músicos e de cociñeiros de prestixio galegos, iniciando hoxe estas master class co músico Abraham Cupeiro, musicólogo, compositor e intérprete galego que interpreta diferentes obras con instrumentos de vento da Idade do Ferro.
Imaxes relacionadas
