Rueda anuncia que a Xunta restaurará a capela da illa de Cortegada cun investimento de 600.000 €

O presidente galego visitou este arquipélago do Parque Nacional das Illas Atlánticas

Rueda anuncia que a Xunta restaurará a capela da illa de Cortegada cun investimento de 600.000 €

Adianta que se prevé licitar as obras nas vindeiras semanas co obxecto de que este ben protexido polo seu valor cultural se incorpore aos usos do Parque Nacional da Illas Atlánticas recuperando a memoria e a historia da illa e das súas xentes

Pon en valor outras medidas de mellora de Cortegada impulsadas polo Goberno galego, como o apoio a programas para eliminar especies invasoras

O mandatario galego augura un “fantástico verán“ para Galicia en materia de turismo

Illa de Cortegada (Vilagarcía de Arousa), 30 de xuño de 2023

O presidente da Xunta, Alfonso Rueda, anunciou hoxe que o Goberno galego restaurará a capela da Virxe dos Milagres da Illa de Cortegada cun investimento de 600.000 euros e cuxa licitación se prevé para as vindeiras semanas.

Así o deu a coñecer o mandatario galego, quen acompañado pola vicepresidenta segunda e conselleira de Medio Ambiente, Territorio e Vivenda, Ángeles Vázquez, visitou esta mañá o arquipélago do Parque Nacional das Illas Atlánticas. Neste enclave, destacou o seu importante patrimonio-cultural, como reflicte esta capela de estilo renacentista e que forma parte do Catálogo do Patrimonio Cultural de Galicia. Rueda lembrou que se trata dun ben protexido que, tras estas actuacións, incorporarase aos usos do Parque Nacional das Illas Atlánticas para “recuperar a memoria e historia” da illa e das súas xentes.

No 2017, a Dirección Xeral de Patrimonio xa realizou obras de consolidación de urxencia das ruínas da capela. Agora, con esta nova intervención, construiranse os muros derrubados, a bóveda, limparase o interior e renovaranse carpinterías, entre outras accións.

Ademais do seu patrimonio cultural, o presidente da Xunta fixo especial fincapé no gran valor natural e medioambiental da Illa de Cortegada, como reflicte o feito de que alberga o maior bosque de loureiro de Europa ou que nela se poden gozar de praias paradisíacas, o que a converten nun modelo do turismo sustentable polo que aposta o Goberno galego. Por estes motivos, Rueda remarcou o grande atractivo desta ”marabilla” natural, que no último ano triplicou o número de visitantes ata chegar aos 2.150 entre xaneiro e maio.

“Fantástico verán” para Galicia no eido turístico

Precisamente, nesa liña, augurou un “fantástico verán” para toda Galicia desde o punto de vista turístico, en referencia ás cifras récords de turistas que se están rexistrando con máis de 174.000 compostelas entregadas no que vai de ano e máis de 1,5 millóns de visitantes. Neste senso, garantiu que a Administración autonómica traballa para preservar e coidar as contornas naturais que caracterizan a paisaxe galega e que supoñen un atractivo para os visitantes.

O presidente da Xunta aproveitou a visita á illa para coñecer de primeira man o traballo para garantir a biodiversidade autóctona que realizan 15 persoas con discapacidade intelectual ou trastornos do espectro autista. Encárganse da eliminación de especies invasoras grazas a un programa da Xunta e do centro especial de emprego BATA. O presidente agradeceu o labor “útil, necesario e imprescindible” que realizan para mellorar a illa e salientou a importancia de iniciativas deste tipo para impulsar a inserción laboral destes colectivos.

Imaxes relacionadas

Cultura Patrimonio Medio ambiente

Departamento:

A Presidencia da Xunta; C. de Medio Ambiente e Cambio Climático; C. de Educación, Ciencia, Universidades e Formación Profesional

Data de actualización: 30/06/2023

Novas relacionadas

A Xunta continúa a difundir o legado de Luísa Villalta cunha mostra no Museo do Mar de Galicia

A Xunta enche o Monte do Gozo de actividades para toda a familia co Festival ‘Revenidas Miúdo’

A Xunta e a USC investigan o xacemento de corro dos mouros, en Lugo, que data do final da Idade de Bronce