A Xunta destaca o seu compromiso coa mellora da seguridade e da saúde laboral no sector mineiro
O director xeral de Planificación Enerxética e Recursos Naturais, Pablo Fernández Vila, participou esta mañá en Santiago de Compostela na apertura dunha xornada técnica organizada polo Instituto Nacional de Silicose
O director xeral de Planificación Enerxética e Recursos Naturais, Pablo Fernández Vila, participou esta mañá en Santiago de Compostela na apertura dunha xornada técnica organizada polo Instituto Nacional de Silicose.
Fernández Vila lembrou o compromiso da Xunta neste sentido, pois desde 2018 existen xa liñas de axudas específicas para actuación que melloren a calidade do ambiente atmosférico mediante a redución das emisións de po e ruído ou a redución da exposición ao po.
Na súa intervención, o director xeral tamén explicou que a Xunta conta coa Axenda de impulso da minaría sustentable de Galicia, unha folla de ruta consensuada co sector que recolle 29 iniciativas nun total de nove eixes para fortalecer a competitividade mineira na Comunidade.
Tal e como informou, un destes eixes está enfocado a mellorar a seguridade e saúde laboral dos traballadoras e traballadores buscando o risco cero. Deste xeito, contempla incentivos para impulsar proxectos tecnolóxicos que axuden a reducir accidentes e para outros aspectos relacionados coa prevención de riscos laborais.
Como exemplo, destacan iniciativas e actuacións concretas como as colaboracións co propio Instituto Nacional de Silicose, pero tamén coa Inspección de Traballo e Seguridade Social, o labor que se desenvolve co Grupo de Traballo de Sílice Cristalina creado no Consello Galego de Seguridade e Saúde Laboral, a realización de campañas de sensibilización e asesoramento técnico, ou a colaboración con institucións sobre traballos con exposición a sílice cristalina respirable.